ഇന്ത്യയിൽ ലോഞ്ച് ചെയ്യാൻ ഒരുങ്ങി ലെനോവോയുടെ ഉടമസ്ഥതയിലുള്ള സ്മാർട്ട്ഫോൺ ബ്രാൻഡ് മോട്ടോറോള മോട്ടോ G30, മോട്ടോ G10 സ്മാർട്ട്ഫോണുകൾ. മാർച്ചിൽ തന്നെ മോട്ടോ G30, മോട്ടോ G10 സ്മാർട്ട്ഫോണുകൾ വില്പനക്കെത്തും എന്നാണ് പ്രമുഖ ടിപ്പ്സ്റ്റർമാർ നൽകുന്ന വിവരങ്ങൾ അനുസരിച്ചുള്ള റിപ്പോർട്ട്‌. ഈ മാസത്തിന്റെ തുടക്കത്തിൽ യൂറോപ്യൻ വിപണിയിൽ പുതുതായി അവതരിപ്പിച്ച ഫോണുകളാണ് മോട്ടോ G30-യും മോട്ടോ G10-ഉം. മോട്ടോറോള പുത്തൻ ഫോണുകളുടെ വരവ് സ്ഥിരീകരിച്ചിട്ടില്ല.
മാർച്ച് ആദ്യ വാരം തന്നെ ടിപ്പ്സ്റ്റർ മുകുൾ ശർമ്മ മോട്ടോ G30, മോട്ടോ G10 സ്മാർട്ട്ഫോണുകളുടെ ലോഞ്ചുണ്ടാകും എന്ന് ട്വീറ്റ് ചെയ്തിട്ടുണ്ടായിരുന്നു. യൂറോപ്പിൽ 179.99 യൂറോ (ഏകദേശം 15,900 രൂപ) ആണ് മോട്ടോ G30-ന് 149.99 യൂറോയാണ് (ഏകദേശം 13,300 രൂപ) മോട്ടോ G10-ന്റെ വില. ഇന്ത്യയിലെ വിലയും ഏറെക്കുറെ സമാനമാവും എന്നാണ് വിവരം. മോട്ടോ G30 പാസ്റ്റൽ സ്കൈ, ഫാന്റം ബ്ലാക്ക് നിറങ്ങളിൽ വിപണിയിൽ എത്തിയപ്പോൾ മോട്ടോ G10 എത്തിയത് ഔറോറ ഗ്രേ, ഇറിഡിസെന്റ് പേൾ നിറങ്ങളിലാണ്.
മോട്ടോ G30-യ്ക്ക് 90Hz റിഫ്രഷ് റേറ്റുള്ള 6.5 ഇഞ്ച് എച്ച്ഡി + (720×1,600 പിക്‌സൽ) ഐപിഎസ് ഡിസ്‌പ്ലേയാണ്. പ്രോസസ്സർ സ്‌നാപ്ഡ്രാഗൺ 662 SoC ആണ്. മോട്ടോ G30-യ്ക്ക് 64 മെഗാപിക്സൽ പ്രൈമറി സെൻസർ, 8 മെഗാപിക്സൽ അൾട്രാ-വൈഡ് ആംഗിൾ സെൻസർ, മാക്രോ ഷോട്ടുകൾക്കും ഡെപ്ത് സെൻസിംഗിനുമായി രണ്ട് 2 മെഗാപിക്സൽ സെൻസറുകൾ എന്നിവ ഉൾപ്പെടുന്ന ക്വാഡ് റിയർ ക്യാമറ സജ്ജീകരണം ആണ്. 13 മെഗാപിക്സൽ സെൽഫി ക്യാമറയും ഹാൻഡ്സെറ്റിനുണ്ട്. 20W ചാർജിങ് സപ്പോർട്ട് ചെയ്യുന്ന 5,000 എംഎഎച്ച് ബാറ്ററിയാണ് മോട്ടോ G30യ്ക്ക്. 3.5 എംഎം ഹെഡ്‌ഫോൺ ജാക്ക്, എൻ‌എഫ്‌സി, യുഎസ്ബി ടൈപ്പ്-സി പോർട്ട് എന്നിവയാണ് കണക്റ്റിവിറ്റി ഓപ്ഷനുകൾ.
മോട്ടോ G10-ന് 60Hz റിഫ്രഷ് റേറ്റുള്ള 6.5 ഇഞ്ച് എച്ച്ഡി + ഡിസ്പ്ലേ ആണ്. ഇതിന്റെ പ്രോസസ്സർ സ്‌നാപ്ഡ്രാഗൺ 460 SoC ആണ്. 48 മെഗാപിക്സൽ പ്രൈമറി സെൻസർ ഉൾപ്പെടുന്ന ക്വാഡ് റിയർ ക്യാമറ സജ്ജീകരണമാണ് മോട്ടോ G10-ൽ. മോട്ടോ G30-യ്ക്ക് സാമാനമാണ് മറ്റുള്ള മൂന്ന് സെൻസറുകളും. 5,000 എംഎഎച്ച് ബാറ്ററിയുള്ള മോട്ടോ G10, 10W ചാർജിംഗിനെ പിന്തുണയ്ക്കുന്നു. കണക്റ്റിവിറ്റി ഓപ്ഷനുകളിൽ 3.5 എംഎം ഹെഡ്‌ഫോൺ ജാക്ക്, യുഎസ്ബി ടൈപ്പ്-സി പോർട്ട് എന്നിവ ഉൾപ്പെടുന്നു.
