1994ൽ പുറത്തിറങ്ങിയ പവിത്രം എന്ന സിനിമയിലെ മീനാക്ഷി എന്ന കഥാപാത്രമാണ് വിന്ദുജാ മേനോൻ എന്ന നടിയെ ഇന്നും സിനിമാ പ്രേക്ഷകർ നെഞ്ചേറ്റാൻ കാരണം. സിനിമയേക്കാളും ഒരു പക്ഷെ അതിനേക്കാളും പെർഫെക്ഷനോടെയാണ് വിന്ദുജ പിന്നീട് മിനി സ്ക്രീൻ പ്രേക്ഷകരുടെ മുൻപിലും എത്തുന്നത്. വിവാഹം കഴിഞ്ഞ ശേഷം അഭിനയത്തിൽ നിന്നൊക്കെ ഇടവേള എടുത്തെങ്കിലും നൃത്തത്തിൽ ഇപ്പോഴും സജീവമാണ് വിന്ദുജ. സ്വകാര്യ ചാനലിൽ പങ്കെടുക്കാൻ എത്തിയ വിന്ദുജ സംസാരിച്ച വാക്കുകൾ ആണ് ശ്രദ്ധ നേടുന്നത്.
ഇപ്പോഴും പഴയ മീനാക്ഷിയെ പോലെ തന്നെ സുന്ദരി ആയിരിക്കാൻ എങ്ങിനെ സാധിക്കുന്നു എന്ന ചോദ്യത്തിനാണ് വിന്ദുജ മറുപടി പറഞ്ഞിരിക്കുന്നത്. അതൊരു ബ്ലസിങ് ആയിട്ടാണ് കാണുന്നത്. ഡാൻസും പാട്ടും ഒക്കെയായി എപ്പോഴും എൻഗേജ്ഡ് ആയി സന്തോഷത്തോടെ ഇരിക്കാൻ ശ്രമിക്കാറുണ്ട്. എപ്പോഴും അത് സാധിക്കില്ലെങ്കിലും എല്ലാ അവസരങ്ങളിലും ഒരു സന്തോഷം ജീവിതത്തിൽ കൊണ്ടുവരാൻ ശ്രമിക്കാറുണ്ട്. അതിന്റെ ഒക്കെ ഭാഗമായി എല്ലാവരുടെയും അനുഗ്രഹത്തോടെ ആണ് ഇങ്ങിനെ ഹാപ്പി ആയി മുന്നോട്ട് പോകുന്നത്. പ്രിയദർശൻ അങ്കിളിന്റെ ഒന്നാനാം കുന്നിൽ ഒരടി കുന്നിൽ എന്ന ശങ്കറേട്ടന്റെ സിനിമയിൽ കോറസ് പാടാൻ പോയിരുന്നു. അവിടെ നിന്നും കണ്ടിട്ട് സിനിമയിലേക്ക് ബാല താരമായി വിളിച്ചു. ഇവരുടെയൊക്കെ കൂടെ ഇത് തുടങ്ങാൻ പറ്റിയത് ഒരു വലിയ ഭാഗ്യം ആണെന്ന് കരുതുന്നു.
എല്ലാവരും വിചാരിക്കുന്നത് ഞാൻ 1991 ലെ കലാതിലകം ആയപ്പോഴാണ് സിനിമയിലേക്ക് വന്നത് എന്നായിരുന്നു. സിനിമയിലേക്ക് ഞാൻ എത്തുന്നത് പ്രീഡിഗ്രി ഫസ്റ്റ് ഇയർ കഴിഞ്ഞപ്പോൾ ആയിരുന്നു. കുടുംബവുമായി അടുപ്പമുള്ള രാജീവേട്ടൻ ആണ് എന്നെ സിനിമയിലേക്ക് വിളിക്കുന്നത്. എല്ലാ ക്രെഡിറ്റും രാജീവേട്ടനും ചേട്ടച്ഛനും ആണ്. എല്ലാവരും എന്നെ അവരോടൊപ്പം ഉയർത്താൻ നോക്കിയത് കൊണ്ടാണ് ആ സിനിമ അത്രയും മനോഹരമായത്. അന്ന് മുതൽ ലാലേട്ടനെ ചേട്ടച്ഛൻ എന്ന് തന്നെയാണ് വിളിക്കുന്നത്. സിനിമയിൽ അഭിനയിക്കുന്ന സമയത്ത് പോലും ലാൽ സാർ എന്നോ ലാലേട്ടൻ എന്നോ വിളിച്ചിട്ടില്ല. അന്ന് മുതൽ ഞാൻ ചേട്ടച്ഛൻ എന്ന് തന്നെയാണ് വിളിക്കുന്നത്. ഇന്നും സംസാരിക്കുമ്പോൾ ഞാൻ കരുതാറുണ്ട് അത് മാറ്റി വിളിക്കണം എന്നൊക്കെ. പക്ഷെ ഫ്ലുവെൻറ് ആയി വരുന്നത് ചേട്ടച്ഛൻ എന്ന് തന്നെയാണ്. ലാസ്റ്റ് തവണ കണ്ടപ്പോഴും ഞാൻ ചേട്ടച്ഛൻ എന്ന് തന്നെയാണ് വിളിച്ചത്.
