നമ്മുടെ ശരീര ഭാഗങ്ങൾക്കുള്ളിലെ ഏതെങ്കിലുമൊരു അവയവത്തിനുള്ളിൽ അല്ലെങ്കിൽ ഒരു ചെറു കോശത്തിൽ പിറവിയെടുക്കുന്ന ഏറ്റവും അപകടകാരമായ രോഗമാണ് കാൻസർ. രോഗവും അതിൻ്റെ ലക്ഷണങ്ങളും തിരിച്ചറിയാൻ വൈകുന്നതിന് അനുസരിച്ച് ക്യാൻസർ വേഗത്തിൽ വളർച്ച പ്രാപിക്കുകയും അസാധാരണവും അനിയന്ത്രിതവുമായ രീതിയിൽ അത് മറ്റ് അവയവങ്ങളിലേക്ക് വ്യാപിക്കുകയും ചെയ്യുന്നു. ആഗോളതലത്തിൽ തന്നെ ഇന്ന് ഏറ്റവുമധികം ആളുകൾ മരണപ്പെടുന്നതിൻ്റെ രണ്ടാമത്തെ കാരണം ക്യാൻസർ രോഗമാണ്. അതായത് ഓരോ വർഷവും കുറഞ്ഞത് 9.6 ദശലക്ഷത്തിലധികം ആളുകൾ ക്യാൻസർ രോഗം മൂലം മരണമടയുന്നുണ്ട് എന്നാണ് കണക്ക്.
ഈ ദിനത്തിൽ ലോകമെമ്പാടും ക്യാൻസർ രോഗത്തെക്കുറിച്ചുള്ള ചർച്ചകൾ നടക്കുകയും അവബോധം സൃഷ്ടിക്കാനുള്ള പ്രവർത്തനങ്ങളിൽ ഏർപ്പെടുകയും ചെയ്യാറുണ്ട്. ഈ വർഷത്തെ കാൻസർ രോഗ ദിനത്തിൽ പുരുഷന്മാരിൽ ഏറ്റവും സാധാരണമായി കണ്ടുവരുന്ന നാലുതരം കാൻസറുകളെ പറ്റിയും അവയുടെ കാരണങ്ങളെക്കുറിച്ചും, അവ എങ്ങനെ രോഗനിർണ്ണയം നടത്താം എന്നതിനെക്കുറിച്ചും ചികിത്സകളെക്കുറിച്ചുമെല്ലാം ചർച്ച ചെയ്യാം.
പുരുഷന്മാരിലെ ഈയിടെയായി ഏറ്റവുമധികം കണ്ടുവരുന്ന ഒന്നാണ് പ്രോസ്റ്റേറ്റ് ക്യാൻസർ. ഒരു പുരുഷന്റെ ശരീരത്തിലെ പ്രത്യുത്പാദന മേഖലയിലെ ഒരു പ്രധാന അവയവമാണ് പ്രോസ്റ്റേറ്റ് ഗ്രന്ഥി. പ്രത്യുൽപാദനത്തിന് ആവശ്യമായ ബീജ ഉൽപാദനത്തിൻ്റെ ശരിയായ പ്രവർത്തനത്തെ സഹായിക്കുക എന്നതാണ് പ്രോസ്റ്റേറ്റ് ഗ്രന്ഥിയുടെ പ്രധാന ധർമ്മം. മൂത്രസഞ്ചിയുടെ താഴെയായും മലാശയത്തിനു മുന്നിലായുമാണ് ഈ ഗ്രന്ഥിയുടെ സ്ഥാനം. ക്യാൻസർ കോശങ്ങൾ പ്രോസ്റ്റേറ്റ് ഗ്രന്ഥിയിൽ വികസിക്കുമ്പോൾ ഇത് മൂത്രവിസജ്ജന വ്യവസ്ഥയെയും അതിന്റെ പ്രവർത്തനങ്ങളെയും തടസ്സപ്പെടുത്തുന്ന ലക്ഷണങ്ങളെ പുറത്ത് കാട്ടാൻ തുടങ്ങുന്നു. അസ്ഥി വേദന, മൂത്രത്തിൽ രക്തം കാണപ്പെടുന്നത്, മൂത്രം കടന്നുപോകുമ്പോൾ കഠിനമായ വേദനയും ബുദ്ധിമുട്ടും അനുഭവപ്പെടൽ എന്നിവയാണ് പ്രോസ്റ്റേറ്റ് ക്യാൻസറിൻ്റെ പ്രാഥമിക രോഗലക്ഷണങ്ങൾ. പ്രോസ്റ്റേറ്റ് ക്യാൻസർ ഉണ്ടാകുന്നതിനു പിന്നിൽ ഇന്നും വ്യക്തമല്ലാത്തതും കണ്ടെത്താൻ കഴിയാത്തതുമായ പല കാരണങ്ങളും ഉണ്ട്.
അമിതമായ അളവിൽ മാംസാഹാരം കഴിക്കുന്നതും കൊഴുപ്പുകൂടിയ ഭക്ഷണങ്ങളുടെ ഉപയോഗം പഴങ്ങളുടെയും പച്ചക്കറിയും ഒഴിവാക്കുക തുടങ്ങിയ ശീലങ്ങൾ പ്രോസ്റ്റേറ്റ് കാൻസറിനുള്ള സാധ്യത കൂട്ടുമെന്ന് ചില ഗവേഷണങ്ങൾ പറയുന്നു. ജീനുകൾ വഴിയും അതായത് ഒരാളുടെ അച്ഛനോ സഹോദരനോ അടുത്ത ബന്ധുക്കൾക്കോ പ്രോസ്റ്റേറ്റ് കാൻസർ ഉണ്ടായിട്ടുണ്ടെങ്കിൽ ഇതുണ്ടാകാനുള്ള സാധ്യത കൂടുതലുള്ളതായും കണക്കാക്കാം. രോഗലക്ഷണങ്ങൾ ഉണ്ടെങ്കിൽ അൾട്രാസൗണ്ട് സ്കാനിങ്ങിലൂടെയും ബയോപ്സി ടെസ്റ്റിലൂടെയും രോഗനിർണ്ണയം നടത്താനാകും. സർജറി അല്ലെങ്കിൽ മറ്റ് റേഡിയേഷൻ ചികിത്സകൾ എന്നിവയിലൂടെ ക്യാൻസറിനെ പൂർണമായും സുഖപ്പെടുത്താൻ കഴിയുമെങ്കിലും രോഗിയുടെ ആരോഗ്യസ്ഥിതി ഇതിൽ ഏറ്റവും പ്രധാന്യമർഹിക്കുന്നതാണ്.
പുരുഷൻമാരിൽ ഏറ്റവും കൂടുതലായി കണ്ടുവരുന്ന രണ്ടാമത്തെ കാൻസറാണ് ശ്വാസകോശാർബുദം. വർഷംതോറും ഈ രോഗം ബാധിച്ച് ലക്ഷക്കണക്കിന് ആളുകളാണ് ഓരോ രാജ്യത്തും മരണമടയുന്നത്. അനിയന്ത്രിതമായ പുകവലി ശീലങ്ങൾ തന്നെയാണ് ഈ അർബുദത്തിന്റെ പ്രധാന കാരണമെന്ന കാര്യം പ്രത്യേകം എടുത്തു പറയേണ്ടതില്ല. സിഗരറ്റ്, ബീഡി, പുകയില എന്നിവയിൽ കാൻസറിന് കാരണമാകുന്ന ഒട്ടേറെ കാർസിനോജനുകൾ അടങ്ങിയിട്ടുള്ളതായി കണക്കാക്കിയിരിക്കുന്നു. പുകവലി ശീലങ്ങൾ ഉള്ള ഏതൊരാളെയും ഇത് ബാധിക്കാനുള്ള സാധ്യതയുണ്ട്. എല്ലാ രീതിയിലും ഏറ്റവും മാരകമായ ഒരു ക്യാൻസറാണ് ശ്വാസകോശ അർബുദം. പരിസ്ഥിതി മലിനീകരണം, പുകയില വസ്തുക്കളുടെ അമിതമായ ഉപയോഗം തുടങ്ങിയവയെല്ലാം രോഗത്തെ വിളിച്ചുവരുത്തുന്നു. ചിലർക്ക് ജനിതകമായ കാരണങ്ങൾകൊണ്ടും ശ്വാസകോശ അർബുദം ഉണ്ടാകാമെന്നും കണക്കാക്കിയിരിക്കുന്നു. ചുമ, ശ്വാസതടസ്സം, നെഞ്ചുവേദന, ശബ്ദത്തിലെ ഇടർച്ച, ശ്വാസമെടുക്കുമ്പോഴുള്ള ശബ്ദം, ഉമിനീരിലെ മാറ്റം, രക്തം ചുമയ്ക്കുന്നത് എന്നിവയെല്ലാം ശ്വാസകോശ അർബുദത്തിന്റെ സാധാരണ ലക്ഷണങ്ങളാണ്.
പുരുഷൻമാരിൽ കണ്ടുവരുന്ന മറ്റൊരുതരം ക്യാൻസറാണ് കോളോറെക്ടൽ ക്യാൻസർ അഥവാ മലാശയ അർബുദം. അർബുദങ്ങളിൽ ഏറ്റവും ഗുരുതരവും സങ്കീർണവുമായതാണ് ഇത്. വൻകുടലിന്റെ അവസാനഭാഗം മുതൽ മലദ്വാരം വരെയുള്ള ഭാഗത്താണ് ക്യാൻസർ കോശങ്ങൾ വേരുറുപ്പിക്കുക. കൊളൊറെക്ടൽ ക്യാൻസർ ജനിതകമായി ഉണ്ടാകാമെങ്കിൽ പോലും ഇന്നത്തെ കണക്കനുസരിച്ച് രോഗികളുടെ എണ്ണം ഇത്രയധികം വർദ്ധിച്ചുവരുന്നതിൻ്റെ പ്രധാനകാരണം ജീവിതശൈലിയുമായി ബന്ധപ്പെട്ട് ഉണ്ടായിട്ടുള്ള മാറ്റങ്ങളാണ്. അമിതവണ്ണം, പുകവലി, മദ്യപാനം എന്നിവയോടൊപ്പം സംസ്കരിച്ചതും അധിക അളവിൽ കൊഴുപ്പ് അടങ്ങിയതുമായ ഭക്ഷ്യ പദാർത്ഥങ്ങൾ കഴിക്കുന്നതും, ഫൈബർ അടങ്ങിയ ഭക്ഷണങ്ങൾ കുറയ്ക്കുന്നതും, വ്യായാമരഹിതമായ ജീവിതശൈലി നയിക്കുന്നതുമെല്ലാം ഈ ക്യാൻസറിന് വഴിവയ്ക്കുന്ന ഘടകങ്ങളാണ്.
വയറുവേദന, മലാശയത്തിൽ കാണുപ്പെടുന്ന രക്തസ്രാവം, മലവിസർജ്ജന രീതികളിൽ ഉണ്ടാവുന്ന മാറ്റങ്ങൾ, പെട്ടെന്ന് ശരീരഭാരം കുറയൽ തുടങ്ങിയവയാണ് ഇതിൻ്റെ പ്രധാന ലക്ഷണങ്ങൾ. സ്ക്രീനിങ്ങിലൂടെ നേരത്തെ തന്നെ രോഗനിർണയം നടത്താനാവും. ശസ്ത്രക്രിയ, റേഡിയേഷൻ ചികിത്സ, ചില സാഹചര്യങ്ങളിൽ മരുന്നുകൾ ഉപയോഗിച്ചുകൊണ്ടുള്ള ചികിത്സാ രീതികൾ തുടങ്ങിയ അവലംബിക്കാമെങ്കിലും, രോഗം മറ്റു ഭാഗങ്ങളിലേക്ക് വ്യാപിച്ചാൽ അപകടസാധ്യത ഇരട്ടിയാകും. അതുകൊണ്ടുതന്നെ നേരത്തെ രോഗം തിരിച്ചറിയുന്നത് പ്രധാനമാണ്. മധ്യവയസ്സു കഴിഞ്ഞ ആളുകൾ പ്രത്യേകിച്ചും 50 വയസ്സിനും അതിനുമുകളിൽ പ്രായമുള്ള പുരുഷന്മാർ ഓരോ 5 മുതൽ 10 വർഷം കൂടുമ്പോഴും ആവർത്തിച്ച് രോഗനിർണയ പരിശോധനകൾ നടത്താൻ ശുപാർശ ചെയ്യുന്നു. നേരത്തെ തന്നെ രോഗം കണ്ടെത്താൻ കഴിയുന്നത് വഴി അപകടസാധ്യതകൾ ഒരു പരിധി വരെ കുറയ്ക്കാനും ശരിയായ ചികിത്സ വേഗത്തിൽ ഉറപ്പാക്കുകയും ചെയ്യാനാവും.
മനുഷ്യ ശരീരത്തിൽ ഏറ്റവും പ്രധാനപ്പെട്ട അവയവങ്ങളിൽ ഒന്നാണ് കരൾ. കരളിനെ ബാധിക്കുന്ന അസുഖം എന്തായാലും അത് മുഴുവൻ ശാരീരിക പ്രവർത്തനങ്ങളെയും തൽക്ഷണം അവതാളത്തിലാക്കും എന്നുറപ്പ്. ഇന്ന് പുരുഷന്മാർ ഏറ്റവും കൂടുതൽ നേരിടുന്ന ക്യാൻസർ രോഗങ്ങളുടെ പട്ടികയിൽ കരൾ അർബുദവും ഉൾപ്പെടുന്നു. ഒരാളിൽ ലിവര് ക്യാന്സർ ഉണ്ടാവുന്നതിന് പിന്നിൽ കാരണങ്ങള് പലതുണ്ട്. പുരുഷന്മാരിലെ അമിത മദ്യപാനശീലം ഇതിന് ഒരു പ്രധാന കാരണമാണ്. അതോടൊപ്പം മറ്റു കരള് രോഗങ്ങളും, അമിതവണ്ണം, പ്രമേഹം, ചില മരുന്നുകളുടെ ഉപയോഗം എന്നിവയെല്ലാം ലിവര് ക്യാന്സറിനുള്ള കാരണങ്ങളില് ഉൾപെടുന്നുവെന്ന് ഗവേഷണങ്ങൾ പറയുന്നു. ചില സാഹചര്യങ്ങളിൽ ശരീരത്തിന്റെ മറ്റ് ഭാഗങ്ങളിൽ നിന്ന് കരളിലേക്ക് ക്യാൻസർ വ്യാപിക്കാനുള്ള സാധ്യതയുമുണ്ട്. മഞ്ഞപ്പിത്തം ഗുരുതരമാകുന്നതും ഇതിലേക്കുള്ള വഴി തുറന്നിടും എന്ന് പറയുന്നു.
മഞ്ഞപ്പിത്തം, വിശപ്പ് കുറയുന്നത്, വയറുവേദന, പ്രത്യേകിച്ചും കാരണമൊന്നുമില്ലാതെ ശരീരഭാരം കുറയുക എന്നിവയെല്ലാം കരൾ കാൻസറിന്റെ പ്രാഥമിക ലക്ഷണങ്ങളാണ്. തുടക്കത്തില് തന്നെ രോഗ നിർണയം നടത്തി കണ്ടെത്താൻ കഴിഞ്ഞാല് സര്ജറിയിലൂടെ അല്ലെങ്കിൽ ലിവര് ട്രാന്സ്പ്ലാന്റിലൂടെ ലിവര് ക്യാന്സര് ഭേദമാക്കാനാവും. കീമോതെറാപ്പി പോലുള്ള ചില ചികിത്സാ രീതികളും ഇതിനായി ഉപയോഗിച്ചു വരുന്നുണ്ട്. അർബുദ സാധ്യതകൾ അകറ്റിനിർത്താനായി മദ്യപാനം പരിമിതപ്പെടുത്തുക, പതിവായി വ്യായാമം ചെയ്യുക, ആരോഗ്യകരമായ ഭക്ഷണം കഴിക്കുക, ശരീരഭാരം നിയന്ത്രിക്കുക, ഹെപ്പറ്റൈറ്റിസ് ബി, സി വൈറസുകൾ ബാധിക്കാതിരിക്കാൻ സ്വയം പരിരക്ഷിക്കുക തുടങ്ങിയ പ്രതിരോധ നടപടികൾ സ്വീകരിക്കണം. ഇവയെല്ലാം കരൾ കാൻസർ വരാനുള്ള സാധ്യത കുറയ്ക്കും.
