മലയാള റാപ്പ് ഗാന ആരാധകര്‍ ഏറെ ആകാംക്ഷയോടെ കാത്തിരുന്ന മലയാളി റാപ്പര്‍ വേടന്റെ പുതിയ ഗാനം വാ ശ്രദ്ധ നേടുന്നു. വേടൻ വിത്ത് വേഡ് എന്ന യൂട്യൂബ് ചാനലിലൂടെയാണ് വീഡിയോ പുറത്തിറങ്ങിയിരിക്കുന്നത്. വിപ്ലവത്തിന്റെ കാറ്റിന് കൂട്ടായി ഒരുമയുടെ സ്വരമാണ് വാ എന്ന റാപ്പ് ഗാനം എന്നാണ് വേടന് യൂട്യൂബില്‍ കുറിച്ചിരിക്കുന്നത്. ഈ ഗാനത്തിൻ്റെ ഒരു ഭാഗം മുൻപ് തന്നെ സോഷ്യൽ മീഡിയയിൽ ശ്രദ്ധ ആകർഷിച്ചിരുന്നു. വേടന് പിന്തുണയറിയിച്ച് പല താരങ്ങളും രംഗത്തെത്തിയിരുന്നു. വേടന്റെ റാപ്പുകളില്‍ ദളിത് രാഷ്ട്രീയവും ഭൂവകാശവും സമകാലീന ഇന്ത്യന്‍ രാഷ്ട്രീയവുമൊക്കെയാണ് ഏറെ ചര്‍ച്ച ചെയ്യപ്പെടുന്നത്.
തന്റെ റാപ്പുകൾ പറയുന്നത് വേട്ടയാടപ്പെടുന്നവരുടെ രാഷ്ട്രീയം പറയുന്നതായിരിക്കുമെന്ന് വേടന് നേരത്തേ വ്യക്തമാക്കിയിട്ടുണ്ട്. വോയ്‌സ് ഓഫ് വോയ്‌സ്ലെസ്സ് എന്ന റാപ്പ് ഗാനത്തിലൂടെയാണ് വേടൻ നേരത്തേ ശ്രദ്ധിക്കപ്പെട്ടത്. രണ്ടായിരത്തി ഇരുപതിൽ ജൂണിൽ പുറത്തിറങ്ങിയ ഈ ഗാനം വലിയ രീതിയിൽ പ്രേക്ഷക ശ്രദ്ധ നേടിയിരുന്നു. ഈ റാപ്പ് ഗാനം മലയാളത്തിലെ മികച്ച റാപ്പ് ഗാനമാണെന്നും ഗാനത്തിൻ്റെ വരികൾ വളരെ മികച്ചതാണെന്നും മലയാളികൾ അറിയിച്ചിരുന്നു തൃശൂര്‍ സ്വദേശി ഹിരണ്‍ദാസ് മുരളിയാണ് വേടൻ എന്ന വിളിപ്പേരിൽ അറിയപ്പെടുന്നത്.
ഹൃത്വിക് ശശികുമാറാണ് റാപ്പ് ഗാനത്തിന്റെ ഛായാഗ്രഹണം നിര്‍വ്വഹിച്ചിരിക്കുന്നത്. ഹൃത്വിക് തന്നെയാണ് ഗാനം സംവിധാനം ചെയ്തിരിക്കുന്നത്, എഡിറ്റിംഗും നിർവ്വഹിച്ചിരിക്കുന്നതും ഹൃത്വിക് തന്നെയാണ്. ഗാനത്തിന്റെ കല സംവിധാനം ചെയ്തിരിക്കുന്നത് ആഷിഫ് എഡയനാണ്. കെവിൻ സോണിയാണ് സംഗീത സംവിധാനം ചെയ്തിരിക്കുന്നത്.
