ഉണ്ണി മുകുന്ദന് മലയാളികളുടെ പ്രിയതാരമാണ്. ഇപ്പോൾ മലയാളത്തില് ഒന്നിനു പിറകെ ഒന്നായി മികച്ച സിനിമകള് വന്നുകൊണ്ടിരിക്കുന്ന സന്തോഷത്തിലാണ് താരം. മലയാളത്തില് ഇനി ഉണ്ണി മുകുന്ദന്റേതായി ഇറങ്ങാനിരിക്കുന്നത് മേപ്പടിയാന്, ഭ്രമം എന്നീ ചിത്രങ്ങളാണ്. ഇപ്പോൾ ഉണ്ണി മുകുന്ദൻ എത്തിയിരിക്കുന്നത് തന്റെ പുതിയ തെലുങ്ക് ചിത്രത്തിന്റെ വിശേഷങ്ങള് പങ്കുവച്ചുകൊണ്ടാണ്.
ഉണ്ണി മുകുന്ദന് തന്നെയാണ് രവി തേജ നായകനാകുന്ന ഖിലാടി എന്ന ചിത്രത്തില് താൻ ഒരു പ്രധാന വേഷം ചെയ്യുന്നു എന്ന കാര്യം പറഞ്ഞത്. ചിത്രത്തിന്റെ ഭൂരിഭാഗം രംഗങ്ങളും ചിത്രീകരിച്ചു കഴിഞ്ഞു. ഏതാനും ചില ദിവസത്തെ ഷൂട്ടിങ് കൂടെ മാത്രമേ ബാക്കി ഉണ്ടായിരുന്നുള്ളൂ, അപ്പോഴേക്കും ലോക്ക് ഡൗണ് ആയി. സ്ഥിതിഗതികള് നിയന്ത്രണ വിധേയമായാല് ഷൂട്ടിങ് പുനരാരംഭിയ്ക്കും എന്ന് ഉണ്ണി മുകുന്ദന് പറഞ്ഞു.
രമേഷ് വര്മയാണ് ചിത്രം സംവിധാനം ചെയ്യുന്നത്. അര്ജ്ജുന് സര്ജ്ജ, മീനാക്ഷി ചൗധരി, ഡിംപിള് ഹയതി എന്നിവരാണ് ചിത്രത്തിലെ മറ്റ് കേന്ദ്ര കഥാപാത്രങ്ങളെ അവതരിപ്പിക്കുന്നത്.
ഉണ്ണി മുകുന്ദന്റെ മൂന്നാമത്തെ തെലുങ്ക് ചിത്രമാണ് ഖിലാടി. നേരത്തെ റിലീസ് ചെയ്ത ജനത ഗാരേജ്, ഭാഗമതി എന്നീ രണ്ട് ചിത്രങ്ങളും മികച്ച വിജയങ്ങളായി തീര്ന്നതോടെ തെലുങ്ക് സിനിമാ പ്രേമികള്ക്ക് പരിചിതനാണ് ഉണ്ണി. മലയാളത്തില് റിലീസിനൊരുങ്ങുന്ന മേപ്പടിയാന് എന്ന ചിത്രം ഉണ്ണി മുകുന്ദന്റെ കരിയറില് ഏറ്റവും പ്രധാനപ്പെട്ട ചിത്രങ്ങളിലൊന്നാണ്. ചിത്രത്തിന് വേണ്ടി ഉണ്ണി മുകുന്ദന് എടുത്ത തീരുമാനങ്ങള് പലതും വാര്ത്തയായിരുന്നു. ചിത്രം നിര്മിക്കുന്നതും ഉണ്ണി മുകുന്ദന് തന്നെയാണ്.
