സൂരജ് തേലക്കാട് മലയാളികളുടെ പ്രിയപ്പെട്ട നടനും കോമഡി താരവുമൊക്കെയാണ്. തന്നാല് കഴിയുന്ന ഉയരങ്ങള് എല്ലാം തന്റെ പൊക്കമില്ലായ്മ ഒരു കുറവായി കാണാതെ കീഴടക്കുകയാണ് അദ്ദേഹം. തനിക്കും ചേച്ചിക്കും ഒരിക്കലും പൊക്കമില്ലായ്മ ഒരു പോരായ്മയായി തോന്നിയിട്ടില്ലെന്ന് പറയുകയാണ് ഇപ്പോള് അദ്ദേഹം. സൂരജ് ഒരു അഭിമുഖത്തില് സംസാരിക്കവെയാണ് ഇത്തരത്തില് പറഞ്ഞത്. പൊക്കമില്ലായ്മ ശരീരത്തിന് മാത്രമേ ഉള്ളൂ എന്നും മനസ്സുകൊണ്ട് തങ്ങള് എത്രയോ ഉയരത്തില് ആണെന്നും സൂരജ് പറഞ്ഞു.
സൂരജിന്റെ വാക്കുകള് ഇങ്ങനെ, എനിക്കും ചേച്ചിക്കും പൊക്കം കൂടാനുള്ള പൊടി വാങ്ങി അച്ഛന്റെ പേഴ്സിലെ കുറേ കാശ് തീര്ന്നിട്ടുണ്ട്. ആ കുപ്പികള് കൊണ്ട് ഞങ്ങളുടെ വീട് നിറഞ്ഞു എന്നല്ലാതെ ഞാന് നാലിഞ്ചില് നിന്നും ചേച്ചി മൂന്നിഞ്ചില് നിന്നും ഒരു സെന്റീമീറ്റര് പോലും വളര്ന്നില്ല. പക്ഷേ വളരാത്തത് പൊക്കം മാത്രമാണ് കേട്ടോ, മനസ്സുകൊണ്ട് ഞാനും ചേച്ചിയും അങ്ങു ഉയരത്തിലാണ്. ലേഹ്യവും അരിഷ്ടവും തുടങ്ങി പല മരുന്നുകളും കിലോക്കണക്കിന് ഇവര് കഴിച്ചിട്ടുണ്ട്. എന്നാല് അതുകൊണ്ടൊന്നും ഇവരുടെ കാര്യത്തില് ഒരു കാര്യവുമില്ല എന്ന് പിന്നീടാണ് രക്ഷിതാക്കള്ക്ക് മനസ്സിലായത്.
ബ്രൗണ് നിറമുള്ള ഒരു ചവര്പ്പുള്ള മരുന്ന് ഡോക്ടര് സ്ഥിരമായി നല്കുമായിരുന്നു. പൊക്കം വരാന് ഉള്ള ആഗ്രഹം കൊണ്ട് രുചി ഒന്നും നോക്കാതെ അത് കണ്ണടച്ചു കഴിക്കുമായിരുന്നു. ഓരോ തവണ ഡോക്ടറുടെ അടുത്ത് ചെല്ലുമ്പോള് ഒരു ചുമരില് ചാരി നിര്ത്തി പൊക്കം അളക്കും. അവസാനം ഡോക്ടര് തന്നെ പറഞ്ഞു ഇത് നടക്കുമെന്ന് തോന്നുന്നില്ല. കാര്യങ്ങള് തിരിച്ചറിയാന് ആകുന്ന പ്രായമായപ്പോള് ഒരു ദിവസം അച്ഛന് തന്നെയും സഹോദരിയേയും വിളിച്ചിട്ട് പറഞ്ഞു, ”നിങ്ങള് ഇനി അധികം പൊക്കം വയ്ക്കില്ല ഇപ്പോള് ഉള്ളതില് നിന്ന് ഇനി വലിയ മാറ്റമൊന്നും ഉണ്ടാകാന് പോകുന്നില്ല ചികിത്സ ഒക്കെ ഭയങ്കര ചെലവാണ്. നമ്മളെക്കൊണ്ട് താങ്ങില്ല. മാത്രമല്ല ചാന്സ് ഫിഫ്റ്റി ഫിഫ്റ്റി മാത്രമേയുള്ളൂ. പാര്ശ്വഫലങ്ങള് ഉണ്ടാവുകയും ചെയ്യും”.
എന്നാല് ഇതൊക്കെ കേള്ക്കുന്നതിനു മുമ്പ് തന്നെ ഞങ്ങളുടെ മനസ്സ് ആ സത്യവുമായി പൊരുത്തപ്പെട്ടിരുന്നു. പണ്ട് സ്കൂളില് പോകുമ്പോള് ബാക്കി കുട്ടികള്ക്ക് എല്ലാം പൊക്കമുള്ളത് കണ്ടിട്ട് പതുക്കെ നമ്മുടെ കാര്യവും ശരിയാകും എന്നായിരുന്നു കരുതിയിരുന്നത്. അച്ഛന് മറ്റൊരു കാര്യവും തന്നോടും സഹോദരിയോടും പറഞ്ഞിരുന്നു. ”കലയാണ് ഇനി നമ്മള് കൂടുതല് ശ്രദ്ധിക്കേണ്ട മേഖല. കലയിലൂടെ നിങ്ങള് വളരണം. എല്ലാവരെക്കാളും ഉയരത്തില് എത്തണം”. അച്ഛന്റെ ആ വാക്കുകളില് നിന്ന് പ്രചോദനമുള്ക്കൊണ്ടാണ് ഞങ്ങള് ഈ നിലയില് എത്തിയത്.