തിരുവനന്തപുരം : സാമൂഹികക്ഷേമ പ്രവര്ത്തന രംഗത്ത് ഉത്തമ മാതൃകയാകുന്ന വനിതകള്ക്കുള്ള കേരള ആര്ട് ലവ്വേഴ്സ് അസോസിയേഷന് ‘കല ‘ യുടെ പ്രഥമ മദര് തെരേസ പുരസ്കാരം സിനിമാ താരം സീമ ജി നായര്ക്ക്. 2021 സെപ്റ്റംബര് 21 ന് രാജ്ഭവനില് നടക്കുന്ന ചടങ്ങില് ഗവര്ണര് ആരിഫ് മുഹമ്മദ് ഖാന് അവാര്ഡ് സമ്മാനിക്കും. അന്പതിനായിരം രൂപയും ഫലകവും പ്രശസ്തിപത്രവും അടങ്ങുന്നതാണ് അവാര്ഡ്. ഈയിടെ അന്തരിച്ച നടി ശരണ്യയുടെ ജീവന് രക്ഷിക്കാന് സീമ നടത്തിയ ത്യാഗനിര്ഭരമായ പ്രവര്ത്തനമാണ് അവരെ അവാര്ഡിന് അര്ഹമാക്കിയത്.
കേരളത്തിലെ ജീവകാരുണ്യ പ്രവര്ത്തനങ്ങളില് മഹനീയ മാതൃകകള് സൃഷ്ടിക്കുന്ന വനിതകള്ക്കാണ് മദര് തെരേസ അവാര്ഡ് സമ്മാനിക്കുന്നതെന്ന് കേരള ആര്ട് ലവ്വേഴ്സ് അസോസിയേഷന് രക്ഷാധികാരിയും ദീപികയുടെ മുന് ഡയറക്ടറുമായ സുനില് ജോസഫ് കുഴമ്പാല (ന്യൂയോര്ക്ക് ), കലയുടെ ട്രസ്റ്റിയും വനിതാ കമ്മീഷന് അംഗവുമായ ഇ. എം രാധ, കലയുടെ മാനേജിങ് ട്രസ്റ്റി ലാലു ജോസഫ് എന്നിവര് അറിയിച്ചു. സിനിമ സീരിയല് രംഗത്തെ മികച്ച അഭിനേത്രിയായ സീമ ജി നായര് നാടകത്തിലൂടെയാണ് കലാരംഗത്ത് എത്തുന്നത്. ആയിരത്തിലധികം നാടകവേദികളില് ഉജ്വലമായ മികവ് പ്രകടിപ്പിച്ചിട്ടുള്ള പ്രതിഭ കൂടിയാണ് സീമ.
