മലയാളികൾക്ക് ഏറെ പ്രിയപ്പെട്ട ചിത്രമാണ് അടി കപ്പ്യാരേ കൂട്ടമണി. ചിത്രത്തിലെ അജു വർഗീസ്, ധ്യാൻ ശ്രീനിവാസൻ, നീരജ് മാധവ്, നമിത പ്രമോദ് തുടങ്ങിയവരെ കേന്ദ്രകഥാപാത്രമാക്കി കോളേജ് ഹോസ്റ്റൽ പശ്ചാത്തലത്തിൽ തയ്യാറാക്കിയ ചിത്രമായിരുന്നു ഇത്. ഇപ്പോഴിതാ ധ്യാന്‍ ശ്രീനിവാസന്‍, നീരജ് മാധവ്, അജു വര്‍ഗ്ഗീസ് എന്നിവരെ കേന്ദ്ര കഥാപാത്രങ്ങളാക്കി നവാഗത സംവിധായകനായ വിനയ് ജോസ് സംവിധാനം ചെയ്യുന്ന ചിത്രമായ ‘പാതിരാ കുര്‍ബാന’യുടെ പുതിയ പോസ്റ്റര്‍ പുറത്തിറങ്ങി. ഈസ്റ്റർ, ക്രിസ്മസ് കാലങ്ങളിൽ അർദ്ധരാത്രിയുള്ള ക്രൈസ്തവ വിശ്വാസികളുടെ പാതിരാ കുർബാനയെ ഓർമ്മിപ്പിക്കുന്നതാണ് പോസ്റ്റർ.
അജു, വിശാഖ് സുബ്രഹ്മണ്യം, ധ്യാൻ എന്നിവരുടെ ഉടമസ്ഥതയിലുള്ള ഫെന്‍റാസ്റ്റിക്ക് ഫിലിംസ് ആണ്‌ ചിത്രം തിയറ്ററുകളിൽ എത്തിക്കുന്നത്. നർമ്മത്തിനൊപ്പം ഹൊററിനും ഏറെ പ്രാധാന്യമുള്ള ചിത്രം മെയ് 25ന് ഷൂട്ടിങ് തുടങ്ങും. നിരവധി ഹിറ്റ് സിനിമകളിൽ സഹ സംവിധായകനായി പ്രവർത്തിച്ചിട്ടുള്ള വിനയ് ജോസ് ആദ്യമായി തന്ത്രസംവിധായകനാകുന്ന ഈ ചിത്രത്തിന്‍റെ തിരക്കഥയും സംഭാഷണവും എഴുതിയിരിക്കുന്നതും വിനയ് തന്നെയാണ്. ബ്ലുലൈൻ മൂവീസിന്‍റെ ബാനറില്‍ റെനീഷ് കായകുളം, സുനീർ സുലൈമാൻ എന്നിവര്‍ ചേര്‍ന്നാണ് സിനിമയുടെ നിര്‍മ്മാണം. കഥ ധ്യാന്‍ ശ്രീനിവാസനാണ് എഴുതിയിരിക്കുന്നത്.
അഖിൽ ജോർജ് ഛായാഗ്രഹണം നിര്‍വഹിക്കുന്ന സിനിമയുടെ സംഗീതം ഷാന്‍ റഹ്മാനാണ് കൈകാര്യം ചെയ്യുന്നത്.
രതിൻ രാധാകൃഷ്ണനാണ് ചിത്രസംയോജനം നിർവ്വഹിക്കുന്നത്, അജയന്‍ മങ്ങാടാണ് കലാസംവിധാനം, ഹസ്സന്‍ വണ്ടൂരാണ് മേക്കപ്പ് നിർവ്വഹണം, സ്റ്റെഫി സേവ്യറാണ് വസ്ത്രാലങ്കാരം, രാജേഷ് തിലകമാണ് പ്രൊജക്റ്റ് ഡിസൈനർ, സജിയാണ് പ്രൊഡക്‌ഷന്‍ കണ്‍ട്രോളര്‍, അരുൺ ഡി ജോസാണ് ചീഫ് അസോസിയേറ്റ് ഡയറക്ടർ. പി.ശിവപ്രസാദാണ് വാർത്ത പ്രചരണം, ഓൺപ്രൊ എന്റെർറ്റൈന്മെന്റ്സാണ് ഡിജിറ്റൽ മാർക്കറ്റിങ്, മാ മി ജോയാണ് പരസ്യകല. ഇതാണ് മറ്റ് അണിയറ പ്രവർത്തകരുടെ വിവരം. കണ്ണൂരും പരിസര പ്രദേശങ്ങളിലുമായി ചിത്രീകരണം നടത്തുന്ന ചിത്രത്തിലെ നായികമാർ പുതുമുഖങ്ങളായിരിക്കും എന്നാണ് സൂചന.
