നമ്മുടെ നാട്ടിലൂടെ കുളിക്കാതെയും നനയ്ക്കാതെയുമൊക്കെ നടക്കുന്നവരെ കണ്ടാല്‍ നമ്മള്‍ക്കൊരു അസ്വസ്ഥത തോന്നില്ലേ. വൃത്തിയും വെടിപ്പും ഇല്ലാത്തവരെന്ന തോന്നലാണ് ഇവരെക്കുറിച്ച്‌ ഓര്‍ക്കുമ്പോൾ തന്നെ പലരുടെയും മനസില്‍ തെളിയുക. മിക്കവാറും മാനസിക ദൗര്‍ബല്യമുള്ളവരാകും പലപ്പോഴും കുളി ഉപേക്ഷിച്ചുനടക്കുന്നത്.
കുളിക്കാത്തതു കുറ്റമല്ല!
എന്നാല്‍, നമീബിയയുടെ വടക്കുപടിഞ്ഞാറന്‍ പ്രദേശത്തെ കുനെനെ ഭാഗത്തുചെന്നാല്‍ കുളിക്കാതെ നടക്കുന്ന ഒരു ഗോത്ര വിഭാഗത്തെ കാണാം. ഹിംബ എന്നറിയപ്പെടുന്ന സെമി-നാടോടികളായൊരു ഗോത്രവര്‍ഗം. കന്നുകാലി വളര്‍ത്തലാണ് ഇവരുടെ പ്രധാന ജീവനോപാധി.ഹിംബ വര്‍ഗക്കാര്‍ കുളിക്കാതെ നടക്കുന്നതു അവരുടെ കുറ്റംകൊണ്ടു മാത്രമല്ല. അവരു താമസിക്കുന്ന പ്രദേശത്തു വെള്ളമില്ല എന്നതാണു പ്രധാന കാരണം. വരണ്ടുണങ്ങിയ കാലാവസ്ഥയാണ്. കുടിവെള്ളത്തിന് ഉള്‍പ്പെടെ അവര്‍ കഷ്ടപ്പെടുകയാണ്. അപ്പോള്‍പിന്നെ ദിവസവും കുളിക്കണമെന്നു പറയാന്‍ പറ്റില്ലല്ലോ.കുളിക്കാന്‍ പറഞ്ഞാല്‍ വെള്ളം തരാന്‍ അവര്‍ പറയും. പക്ഷേ, ഇവര്‍ കുളിക്കാറില്ലെങ്കിലും അഴുക്കും ചെളിയും പിടിച്ചു വികൃത രൂപികളായിട്ടല്ല നടപ്പ്. മറ്റ് നാടോടി ഗ്രൂപ്പുകളെ അപേക്ഷിച്ചു നോക്കുന്പോള്‍ ഇവര്‍ സുന്ദരന്മാരും സുന്ദരികളുമാണ്. കുളിക്കാതെ നടക്കുന്ന ഇവര്‍ എങ്ങനെയാണു സൗന്ദര്യം നിലനിര്‍ത്തുന്നത്.
കിടിലന്‍ പുക കുളി!
വെള്ളംകൊണ്ടുള്ള കുളി ഒഴിവാക്കിയാലും ഇവര്‍ മറ്റൊരു കുളി നടത്താറുണ്ട്. അതാണ് പുക കുളി. പ്രത്യേകം തയാറാക്കിയ സ്ഥലത്ത് ഒൗഷധ കൂട്ടുകള്‍ ചേര്‍ത്ത് ഇവര്‍ തീയിടും. ഇതില്‍നിന്നു കനത്ത പുകയുണ്ടാക്കും. ആ പുക ശരീരത്തിലേക്ക് അടിപ്പിക്കും.ഇതോടെ ഇവരുടെ ശരീരം വെട്ടിവിയര്‍ക്കും. ശരീരത്തിലടിയുന്ന പൊടിയും ചെളിയുമെല്ലാം വിയര്‍പ്പിനൊപ്പം നീക്കം ചെയ്യപ്പെടും. പകരം ഔഷധക്കൂട്ടുകള്‍ പുകയോടൊപ്പം ഇവരുടെ ശരീരത്തിലേക്ക് ആവാഹിക്കുകയും ചെയ്യും.
ചെമ്മണ്ണ് മുടിക്കാരികള്‍
ഈ ഗോത്രക്കാരിലെ സ്ത്രീകള്‍ക്കു വേറൊരു പ്രത്യേകതയുണ്ട്. അവരെ കണ്ടാല്‍ ചെമ്മണ്ണിന്‍റെ കളറാണ്. തലമുടിയാവട്ടെ ചെമ്മണ്ണിന്‍റെ കളറില്‍ കയറുപോലെ തൂക്കിയിട്ടിരിക്കുന്നതും കാണാം. തലമുടി ഇങ്ങനെ ആക്കിയെടുക്കുന്നതിനു പിന്നില്‍ ഇവര്‍ക്കൊരു ചേരുവയുണ്ട്.വെണ്ണ, കൊഴുപ്പ്, ചെമ്മണ്ണ് ഇവ മൂന്നും കൂട്ടിക്കുഴച്ച്‌ ഇവരൊരു മിശ്രിതമുണ്ടാക്കും ഇതു തലമുടിയിലും മുഖത്തും ശരീരത്തുമൊക്കെ ഇവര്‍ തേച്ചു പിടിപ്പിക്കുമത്രേ. ഇതോടെയാണ് ഇവരുടെ ശരീരം ചെമ്മണ്ണിന്‍റെ നിറത്തിലെത്തുക.ഇവര്‍ക്കു വേറെയും ചില രീതികളുണ്ട്. അതിഥികളുമായി കിടക്ക പങ്കിടാന്‍ ഈ സ്ത്രീകള്‍ മടി കാട്ടാറില്ല. നവജാത ശിശുക്കളെ പ്രത്യേകം മാലകള്‍ ധരിച്ച്‌ അലങ്കരിക്കും. തങ്ങളുടെ വിശ്വാസങ്ങളും സംസ്കാരവും പുറത്തുനിന്നുള്ളവര്‍ മലിനമാക്കാതിരിക്കാന്‍ പ്രത്യേകം ശ്രദ്ധിക്കും.
ചെറുപ്പത്തില്‍ കല്യാണം
ഹിം‌ബയിലെ ആണുങ്ങള്‍ പ്രധാനമായും കന്നുകാലി വളര്‍ത്തുന്നവരും കൃഷിക്കാരും ആണ്, അതേസമയം അവരുടെ സ്ത്രീകള്‍ വിറക് ശേഖരിക്കുക, പാചകം ചെയ്യുക, ഭക്ഷണം വിളമ്പുക, വെള്ളം കണ്ടെത്തുക തുടങ്ങിയ ജോലികളില്‍ ഏര്‍പ്പെടുന്നു. ഇക്കൂട്ടര്‍ സമൂഹത്തോടു കൂറുള്ളവരും വലിയ രീതിയില്‍ മതവിശ്വാസം വച്ചു പുലര്‍ത്തുന്നവരുമാണ്. പ്രത്യേകം ദേവന്‍മാരെ ഇവര്‍ ആരാധിക്കുന്നു. ബഹുഭാര്യാത്വം ഇവര്‍ക്കിടയില്‍ പതിവാണ്. ചെറുപ്പത്തില്‍ത്തന്നെ പെണ്‍കുട്ടികള്‍ വിവാഹിതരാകുന്നു. പുറത്തുനിന്നെത്തുന്നവരുമായി അവര്‍ സൗഹാര്‍ദത്തോടെ പെരുമാറും. പക്ഷേ, അവരുടെ സംസ്കാരത്തെ തൊട്ടുകളിക്കാന്‍ അനുവദിക്കില്ല.
