സിനിമ പ്രേക്ഷകര്ക്കിടയില് സുരഭി ലക്ഷ്മി ശ്രദ്ധേയയായത് മികച്ച നടിക്കുള്ള ദേശീയ അവാര്ഡ് നേടിയതോടെയാണ്. മിനിസ്ക്രീൻ കുടുംബപ്രേക്ഷകരുടെ മനസ്സിൽ അതിന് മുൻപുതന്നെ ടെലിവിഷന് പരിപാടികളിലൂടെ താരം ഇടം പിടിച്ചിരുന്നു. സുരഭി അവാര്ഡ് ലഭിച്ചതിന് ശേഷവും ബിഗ് സ്ക്രീനിലും മിനി സ്ക്രീനിലും ഒരുപോലെ സജീവമാണ്. ഇപ്പോള് ഫേസ്ബുക്കിലൂടെ തനിക്ക് ദേശീയ അവാര്ഡ് ലഭിച്ചതിന്റെ ഓര്മ്മ ആരാധകരുമായി പങ്കുവെക്കുകയാണ് സുരഭി. ജീവിതത്തില് എന്നും ഓര്മിക്കപ്പെടുന്ന ദിവസമാണ് നടിയെന്ന നിലയില് ദേശീയ തലത്തില് അംഗീകാരം കിട്ടിയ ദിനമെന്നും, സിനിമയില് ശ്രദ്ധിക്കപ്പെട്ട പ്രധാന വേഷങ്ങളൊന്നും ലഭിക്കാതിരുന്ന എനിക്ക് കരിയറില് ലഭിച്ച ഏറ്റവും മികച്ച വേഷമായിരുന്നു മിന്നാമിനുങ്ങിലേതെന്നും സുരഭി കുറിച്ചു.
2017 ഏപ്രില് 7! ജീവിതത്തില് എന്നും ഓര്മിക്കപ്പെടുന്ന ദിവസം. നടിയെന്ന നിലയില് ദേശീയ തലത്തില് അംഗീകാരം കിട്ടിയ ദിനം. മനോജ് റാംസിങ് കഥയും തിരക്കഥയും എഴുതി, അനില് തോമസേട്ടന് സംവിധാനം ചെയ്ത മിന്നാമിനുങ്ങ് എന്ന ചിത്രത്തിലൂടെ, നിലനില്പ്പിനായുള്ള ഒരു സ്ത്രീയുടെ ഒറ്റപ്പെട്ട പോരാട്ടത്തെ തിരശ്ശീലയില് എത്തിച്ചതിനാണ് മികച്ച നടിയായി തിരഞ്ഞെടുക്കപ്പെട്ടത്. ഔസേപ്പച്ചന് സാറായിരുന്നു ചിത്രത്തിന്റെ സംഗീതം. സിനിമയില് ശ്രദ്ധിക്കപ്പെട്ട പ്രധാന വേഷങ്ങളൊന്നും ലഭിക്കാതിരുന്ന എനിക്ക് കരിയറില് ലഭിച്ച ഏറ്റവും മികച്ച വേഷമായിരുന്നു മിന്നാമിനുങ്ങിലേത്. അന്നും ഇന്നും ഒപ്പമുള്ളവരോട് ഒരുപാട് സ്നേഹം എന്നാണ് സുരഭി ഫേസ്ബുക്കിൽ കുറിച്ചിരുന്നത്.
