ഫെമിന ജോര്ജ് അവതരിപ്പിച്ച ബ്രൂസ്ലി ബിജി മിന്നല് മുരളിയില് ജെയ്സനൊപ്പം തന്നെ കയ്യടി നേടിയ കഥാപാത്രമാണ്. നായകനൊപ്പം പോരുന്ന ഹീറോയിസം കാണിച്ച് നാടിനെ രക്ഷിക്കുന്ന നായികയാണ് ബ്രൂസ്ലി ബിജി. ആദ്യ സിനിമയില് തന്നെ നല്ല കഥാപാത്രത്തെ ലഭിച്ചതിന്റെ സന്തോഷത്തിലാണ് താരമിപ്പോൾ. ഓഡിഷനിലൂടെയായിരുന്നു ഫെമിന ജോര്ജ് സിനിമയിലേക്ക് എത്തിയത്. ആദ്യം അഭിനയിച്ച് കാണിക്കാനാവശ്യപ്പെട്ടത് സ്നേഹ ജോര്ജ് അവതരിപ്പിച്ച ജെയ്സന്റെ സഹോദരിയുടെ കഥാപാത്രമായിരുന്നു എന്നും ഫെമിന പറഞ്ഞു. അതിനു ശേഷം ഭാരം കുറച്ച് വരണമെന്നാണ് സംവിധായകന് ആവശ്യപ്പെട്ടത് എന്നും താരം പറഞ്ഞിരുന്നു.
ഭക്ഷണം കുറച്ചും ജിമ്മിലെ പരിശീലനം കൊണ്ടും ആറ് കിലോയാണ് ചിത്രത്തിന് വേണ്ടി ഫെമിന കുറച്ചത്. മുന്പ് രണ്ടാഴ്ച കരാട്ടെ പഠിച്ചതിന്റെ ആത്മവിശ്വാസം കൈമുതലാക്കിയായിരുന്നു കരാട്ടെ മാസ്റ്ററായി മിന്നല് മുരളിയിലെത്തിയത്. ചിത്രത്തില് ഏറെ ചിരിപ്പിച്ച രംഗമായിരുന്നു ബ്രൂസ്ലി ബിജിയും മിന്നല് മുരളിയും സ്കൂളില് വെച്ച് നടത്തിയ സംഘട്ടനംരംഗവും പിന്നീടുള്ള ബിജിയുടെ വീഴ്ചയും. ഒരാഴ്ചയെടുത്താണ് താനാ രംഗം ചെയ്യാനുള്ള തയാറെടുപ്പുകള് നടത്തിയതെന്ന് പറയുകയാണ് ഫെമിന. ഒരു മാധ്യമത്തിന് നല്കിയ അഭിമുഖത്തിലാണ് ഫെമിന ഷൂട്ടിംഗ് അനുഭവങ്ങള് പങ്കുവെച്ചത്.
വ്ളാഡ് ആയിരുന്നു ആക്ഷന് ചെയ്തിരുന്നത്. സ്കൂളിലെ സംഘട്ടനം ചിത്രീകരിക്കുന്നതിന് മുന്പ് വ്ളാഡിന് എന്നെ കാണണമെന്ന് പറഞ്ഞു. അന്ന് ബ്രൂസ്ലി എന്താണ് ചെയ്യാന് പോകുന്നതെന്നുള്ളതിനെ പറ്റി ഒരു മണിക്കൂര് ക്ലാസെടുത്തു. മിന്നല് മുരളി എല്ലാവരേയും ഇടിച്ചിടുമ്പോള് ബ്രൂസ്ലി അടുത്ത് ചെന്ന് അടിക്കുകയാണ്. അപ്പോഴുള്ള മൂവ് എങ്ങനെയായിരിക്കണമെന്നൊക്കെ പറഞ്ഞുതന്നു. ടൊവി ചേട്ടന്റെ ഡ്യൂപ്പ് ചെയ്ത സെഫയോടൊപ്പമാണ് ഞാന് പ്രാക്ടീസ് ചെയ്തത്. അപ്പൊഴൊന്നും എനിക്ക് സ്പീഡില്ലായിരുന്നു. പക്ഷേ ഒരാഴ്ച കൂടി സമയമുള്ളതിനാല് അതിനുള്ളില് പഠിച്ചെടുത്താല് മതിയെന്ന് പറഞ്ഞു. പിന്നെ ഒരാഴ്ച ഷൂട്ട് കഴിഞ്ഞ വീട്ടില് വരുമ്പോള് ഞാന് പ്രാക്ടീസ് ചെയ്യുമായിരുന്നു. അങ്ങനെയാണ് എനിക്ക് സ്പീഡ് ആയത്,’ ഫെമിന പറഞ്ഞു. നിലത്ത് വീണതിന് ശേഷമുള്ള ബിജിയുടെ എക്സപ്രെഷന് കാണിച്ചു തന്നത് ബേസില് ചേട്ടനാണ്. ചമ്മിയ റിയാക്ഷനാണ് വേണ്ടത്. ബേസിലേട്ടനാണ് വീഴുന്നതെങ്കിലുള്ള റിയാക്ഷന് കാണിച്ചു തന്നു. അങ്ങനെ ചെയ്യാന് പറഞ്ഞു. അതുകഴിഞ്ഞ് എന്റെ രീതിയില് ഒരു റിയാക്ഷന് ഇടാന് പറഞ്ഞു. അതും കാണിച്ചു. അങ്ങനെയൊക്കെയാണ് ആ സീന് വര്ക്കൗട്ട് ആയത്. പക്ഷേ ആ സീനൊക്കെ ജനങ്ങള്ക്ക് ഇത്രയും ഇഷ്ടപ്പെടുമെന്ന് വിചാരിച്ചില്ല,’ ഫെമിന കൂട്ടിച്ചേര്ത്തു.
