നരസിംഹ മന്നാഡിയാരും വീരസിംഹ മന്നാഡിയാരും മലയാളികൾ ഒരിക്കലും മറക്കാൻ പറ്റാത്ത രണ്ടു പേരുകൾ ആണ്. 1993 ൽ ജോഷിയുടെ സംവിധാനത്തിൽ പുറത്തിറങ്ങിയ ചിത്രമാണ് ധ്രുവം. മന്നാഡിയാർ സഹോദരങ്ങളായി മമ്മൂട്ടിയും ജയറാമും നിറഞ്ഞാടിയ ചിത്രമാണ് ധ്രുവം. ഒപ്പം സുരേഷ് ഗോപി ഗൗതമി വിക്രം തുടങ്ങിയ വൻ താരനിര ഈ ചിത്രത്തിൽ അണി നിരന്നിരുന്നു. ചിത്രം വൻ വിജയവുമായിരുന്നു. നീണ്ട വർഷങ്ങളുടെ ഇടവേളയ്ക്ക് ശേഷം മമ്മൂട്ടിയും ജയറാമും പുതിയ ചിത്രത്തിൽ ഒന്നിക്കുന്നു എന്ന് റിപ്പോർട്ടുകൾ. 2008- ൽ പുറത്തിറങ്ങിയ മൾട്ടിസ്റ്റാർ ചിത്രമായ ട്വന്റി-20 ലാണ് ഇരുതാരങ്ങളും അവസാനമായി ഒന്നിച്ചഭിനയിച്ചത്. ഏകദേശം പന്ത്രണ്ടു വർഷങ്ങൾക് ശേഷം വീണ്ടും ഇവർ ഒരുമിക്കുന്നു എന്നാണ് റിപ്പോർട്ടുകൾ.
2018- ൽ ഇരുവരുമൊന്നിക്കുന്ന ചിത്രത്തെക്കുറിച്ചുള്ള ചർച്ചകൾ ആരംഭിച്ചതായിരുന്നു എന്നാൽ പല സാങ്കേതിക കാരണങ്ങൾ കൊണ്ട് ആ പ്രൊജക്ട് നീണ്ടുപോകുകയായിരുന്നു എന്നും ഒരു ത്രില്ലർ സീരീസിൽ പെടുന്ന ചിത്രമായിരിക്കും അണിയറയിൽ ഒരുങ്ങുന്നത് എന്നുമാണ് റിപ്പോർട്ടുകൾ. ഇരുവരും ഒന്നിക്കുന്ന പുതിയ ചിത്രത്തെക്കുറിച്ചുള്ള സൂചനകൾ നൽകിയത് നിർമാതാവ് ജോബി ജോർജ് ആണ്. ഗുഡ്വിൽ എന്റർടൈൻമെന്റസിന്റെ ബാനറിൽ മമ്മൂട്ടിയും ജയറാമും ഒന്നിക്കുന്ന ചിത്രം ഉണ്ടാകുമെന്ന് നിർമാതാവ് സൂചന നൽകിയിരുന്നു. എന്നാൽ ഈ ചിത്രത്തെക്കുറിച്ചുള്ള ഔദ്യോഗികമായ ഒരു പ്രഖ്യാപനം ഇതുവരെയും ഉണ്ടായിട്ടില്ല.
വൺ,ദി പ്രീസ്റ്റ് എന്നീ രണ്ട് ചിത്രങ്ങളാണ് മമ്മൂട്ടിയുടേതായി ഉടൻ തിയേറ്ററുകളിൽ എത്താൻ പോകുന്നത്. പ്രശസ്ത സംവിധായകൻ മണിരത്നം ഒരുക്കുന്ന ബ്രഹ്മാണ്ഡ ചിത്രമായ പൊന്നിയൻ സെൽവനാണ് റിലീസിനൊരുങ്ങുന്ന ജയറാം ചിത്രം. നിരവധി താരങ്ങൾ അണിനിരക്കുന്ന ചിത്രത്തിൽ ജയറാം പ്രധാന കഥാപാത്രത്തെ അവതരിപ്പിക്കുന്നു.
