മലയാള സിനിമാപ്രേക്ഷകര് ഏറെ ആകാംക്ഷയോടെ കാത്തിരിക്കുന്ന ചിത്രമാണ് മാലിക്. ഫഹദ് ഫാസിൽ ആണ് ചിത്രത്തിലെ കേന്ദ്ര കഥാപാത്രത്തെ അവതരിപ്പിക്കുന്നത്. കോവിഡ് സാഹചര്യത്തിൽ മാലികിന്റെ ഒ ടി ടി റിലീസായി എത്തുകയാണിപ്പോൾ. ആമസോണ് പ്രൈമില് ജൂലൈ 15 നാണ് ചിത്രം റിലീസ് ചെയ്യുന്നത്. ആരാധകരെ ആവേശത്തിലാക്കുന്ന തരത്തിലുള്ള ട്രെയ്ലർ മുൻപ് പുറത്ത് വന്നിരുന്നു.
നേരത്തെ തിയേറ്ററിലെത്തുമെന്ന് അറിയിച്ച ചിത്രത്തിന്റെ റിലീസ് കൊവിഡ് നിയന്ത്രണങ്ങളുടെ തുടര്ന്ന് പല തവണ മാറ്റിവെച്ചിരുന്നു.
2020 ഏപ്രില് മാസം റിലീസ് ചെയ്യാന് ഒരുങ്ങിയിരുന്ന ചിത്രം കൊവിഡ് പ്രതിസന്ധി മൂലം 2021 മെയ് 13ലേക്ക് റിലീസ് മാറ്റിവെച്ചിരുന്നു.പിന്നീട് രണ്ടാം തരംഗം ശക്തമായതോടെയാണ് സിനിമ ഒ.ടി.ടിയില് റിലീസ് ചെയ്യാന് തീരുമാനിച്ചതായി നിര്മ്മാതാവ് ആന്റോ ജോസഫ് അറിയിക്കുകയായിരുന്നു.
സുലൈമാന് മാലിക് എന്ന കഥാപാത്രത്തെയാണ് ഫഹദ് ഫാസില് മാലികില് അവതരിപ്പിക്കുന്നത്.ആന്റോ ജോസഫ് ഫിലിം കമ്പനിയുടെ ബാനറില് ആന്റോ ജോസഫ് നിര്മിക്കുന്ന ചിത്രത്തില് ജോജു ജോര്ജ്, ദിലീഷ് പോത്തന്, സലിംകുമാര്, ഇന്ദ്രന്സ്, വിനയ് ഫോര്ട്ട്, പതിനെട്ടാം പടിയിലൂടെ ശ്രദ്ധേയനായ ചന്തുനാഥ് എന്നിവരും അഭിനയിക്കുന്നുണ്ട്.ടേക്ക് ഓഫിന് ശേഷം മഹേഷ് നാരായണന് സംവിധാനം ചെയ്യുന്ന ചിത്രമാണ് മാലിക്. സാനു ജോണ് വര്ഗീസ് ക്യാമറയും സുഷിന് ശ്യാം സംഗീതവും നിര്വഹിക്കുന്നു.
