നമ്മുടെ മലയാളത്തിന്റെ എവർഗ്രീൻ ചോക്ലേറ്റ് ഹീറോ ആരെന്നു ചോദിച്ചാൽ മലയാളികൾ നിസംശയം പറയും അത് കുഞ്ചാക്കോ ബോബനാണ് എന്ന്. അനിയത്തി പ്രാവിലെ സുധി മുതൽ നിഴലിലെ ജോൺ ബേബി വരെയുള്ള യാത്രയിൽ എന്നും മലയാളികൾക്ക് ഏറെ പ്രിയമുള്ള നടൻ തന്നെയാണ് അദ്ദേഹം. താരത്തിനെ പോലെ തന്നെ താരത്തിന്റെ പുത്രൻ ഇസഹാക്കിനും ആരാധകർ നിരവധിയാണ്. സോഷ്യൽ മീഡിയയിൽ സജീവമായ കുഞ്ചാക്കോ ബോബന്റെയും മകന്റെയും ചിത്രങ്ങള്‍ പല തവണ സോഷ്യല്‍ മീഡിയയില്‍ വൈറലായിട്ടുണ്ട്. ഏറ്റവും ഒടുവില്‍ ഇസഹാക്കിന്റെ രണ്ടാം പിറന്നാളിന് എടുത്ത ചിത്രങ്ങളായിരുന്നു ആരാധകര്‍ ഏറ്റെടുത്ത് ആഘോഷമാക്കിയത്. ഇപ്പോള്‍ ചാക്കോച്ചന്‍ ഇന്‍സ്റ്റഗ്രാമില്‍ പങ്കുവച്ച ഇസഹാക്കിനോടൊപ്പമുള്ള ഏറ്റവും പുതിയ ചിത്രവും വൈറലായിമാറിയിരിക്കുവാണ്.
മകനൊപ്പം നില്‍ക്കുന്ന ഫോട്ടോയ്ക്ക് മനോഹരവും, എന്നാൽ ചിന്തിപ്പിക്കുന്നതുമായ അടിക്കുറിപ്പും കുഞ്ചാക്കോ ബോബന്‍ നല്‍കിയിട്ടുണ്ട്. നിങ്ങളുടെ കുഞ്ഞ് നിങ്ങള്‍ക്ക് വെളിച്ചം കാണിച്ചു തരുമ്പോള്‍, ആ കുഞ്ഞ് മനുഷ്യന്റെ പിതാവാകുന്നു. പരീക്ഷണങ്ങളുടെയും അനിശ്ചിതത്വങ്ങളുടെയും ഈ ദിവസങ്ങളില്‍, സുരക്ഷിതമായ നാളെക്കായി സുരക്ഷയും പ്രതീക്ഷയും നിലനിര്‍ത്താം. എല്ലാ തുരങ്കത്തിന്റെയും അവസാനം വെളിച്ചം ഉണ്ടാവുക തന്നെ ചെയ്യും. എല്ലാവരെയും സഹായിക്കുകയും പരിപാലിക്കുകയും ചെയ്യുന്ന, നിഷ്‌കളങ്കരായ കുട്ടികള്‍ ഉണ്ടാവട്ടെ എന്നാണ് കുഞ്ചാക്കോ ബോബന്‍ പങ്കുവച്ച ചിത്രത്തിന് അടിക്കുറിപ്പായി നൽകിയിരിക്കുന്നത്.
കൊവിഡ് 19 രണ്ടാം തരംഗം ഭീകരമായി പടര്‍ന്നു പിടിയ്ക്കുന്ന സാഹചര്യത്തിലാണ് കുഞ്ചാക്കോ ബോബന്റെ ഫോട്ടോയും കുറിപ്പും പുറത്ത് വന്നത്. എന്ത് തന്നെയായാലും ആളുകളെ ഒരു നിമിഷം ചിന്തിയ്ക്കാന്‍ പ്രേരിപ്പിയ്ക്കുന്ന സന്ദേശമാണ് ചാക്കോച്ചന്റേത്. ഒന്‍പതോളം സിനിമകളാണ് നിലവില്‍ കുഞ്ചാക്കോ ബോബന്‍ കരാര്‍ ചെയ്തിരിയ്ക്കുന്നത്. കൊറോണ പശ്ചാത്തലത്തില്‍ ഒന്നിന്റെയും ഷൂട്ടിങ് ആരംഭിച്ചിട്ടില്ല. നായാട്ട്, നിഴല്‍ എന്നിവയാണ് ഏറ്റവും ഒടുവില്‍ കുഞ്ചാക്കോ ബോബന്റേതായി തിയേറ്ററില്‍ എത്തിയ ചിത്രങ്ങൾ.
