പ്രാദേശിക വിനോദ സഞ്ചാര കേന്ദ്രങ്ങളുടെ വികസനം ഇപ്പോൾ നടപ്പിലാക്കി വരികയാണ് ടൂറിസ്റ്റ് വകുപ്പ്.ഇതോടെ വിനോദയാത്രകൾ ഇഷ്ടപ്പെടുന്നവർ തൊട്ടടുത്തുള്ളതും ഒരു ദിവസത്തിനുള്ളിൽ പോയി വരാവുന്നതുമായ ഇടങ്ങളിൽ പോകുവാൻ ആരംഭിച്ചു.ഇത്തരത്തിലൊരു കേന്ദ്രമാണ് എറണാകുളം ജില്ലയിലെ ഇലഞ്ഞി പഞ്ചായത്തിൽ സ്ഥിതി ചെയ്യുന്ന അത്യധികം മനോഹരമായ കോടമഞ്ഞിന്റെ കാഴ്ച സമ്മാനിക്കുന്ന കൂരുമല.
കൂരുമല എറണാകുളം ജില്ലയിലെ ഉയരം കൂടിയ കുന്നുകളിലൊന്നാണ്. കൂരുമലയുടെ ഭംഗി കൂടുതൽ ആസ്വാദ്യകരമാവുന്നത് മൺസൂൺ മാസങ്ങളിലും ഡിസംബർ, ജനുവരി മാസങ്ങളിലും ആണ്. യാത്രാപ്രേമികളെ കൂടുതലായി ഇവിടേക്ക് ആകർഷിക്കുന്നത് കോടമഞ്ഞ് ഇറങ്ങുന്ന കാഴ്ചയാണ്. ഇത് കാണാനായി ഒരുപാടു പേർ പ്രഭാതത്തിലും സന്ധ്യയ്ക്കും ഇവിടെ എത്താറുണ്ട്.
കാറ്റുകൊള്ളാനും മലനിരകളുടെ മനോഹാരിത ആസ്വദിക്കാനും രാത്രിയിൽ നക്ഷത്രങ്ങളെ കണ്ട് കിടക്കാനും ഒക്കെ ആയി പ്രദേശവാസികൾ വളരെ മുൻപ് തന്നെ കൂരുമലയിൽ എത്താറുണ്ടായിരുന്നു. വികസിപ്പിച്ചെടുത്താൽ കൂരുമല നല്ലൊരു ഹിൽസ്റ്റേഷൻ ആയി മാറുമെന്ന് അടുത്ത പ്രദേശത്തിലെ ആളുകൾ നേരത്തെ തന്നെ അഭിപ്രായപ്പെട്ടിരുന്നുസാഹസിക യാത്രകൾ ഇഷ്ടപ്പെടുന്നവർക്ക് ഉയരത്തിലുള്ള പാറകൾ ഉള്ളതിനാൽ സന്ദർശിക്കാൻ പറ്റിയൊരു ഇടം തന്നെയാണ് കൂരുമല. റോക്ക് ക്ലൈമ്പിങ്ങിനുള്ള സൗകര്യവും ഇത്തരക്കാർക്കായി ഇവിടെ ഒരുക്കിയിട്ടുണ്ട്.കൂരുമലയിലെ വികസനപ്രവർത്തനങ്ങൾ അമ്പതു ലക്ഷം രൂപ ചിലവഴിച്ചാണ് സംസ്ഥാന വിനോദ സഞ്ചാര വകുപ്പ് പൂർത്തിയാക്കിയിരിക്കുന്നത്. ഇവിടത്തെ വിനോദസഞ്ചാര സാധ്യത കണക്കിലെടുത്തുകൊണ്ടാണ് ഈ പദ്ധതി നടപ്പിലാക്കുന്നത്.
കൂരുമലയിലേക്കുള്ള നടപ്പാത, മലമുകളിൽ എത്തുന്ന ആളുകൾക്ക് വിശ്രമിക്കുന്നതിനുള്ള മണ്ഡപം എന്നിവ പദ്ധതിയുടെ ഭാഗമായി തയ്യാറായി കഴിഞ്ഞു. വാച്ച് ടവറും കൂടെ പൂർത്തിയായി കഴിഞ്ഞപ്പോൾ മലനിരകളുടെ ഭംഗി പൂർണമായി ആസ്വദിക്കാൻ കഴിഞ്ഞതിന്റെ സന്തോഷത്തിലാണ് സഞ്ചാരികൾ. 2020 ജൂലൈയിൽ വീഡിയോ കോൺഫറൻസിലൂടെ വിനോദ സഞ്ചാര വകുപ്പ് മന്ത്രി കടകംപള്ളി സുരേന്ദ്രൻ ആണ് പദ്ധതി ഉദ്ഘാടനം ചെയ്തത്.എറണാകുളതുനിന്ന് പിറവം വഴി ഇലഞ്ഞിയിൽ എത്തി അവിടുന്ന് 3 കിലോമീറ്റർ ദൂരത്തിലാണ് കൂരുമല ഉള്ളത്. കുറവലങ്ങാട് വഴി ഇലഞ്ഞിയിൽ എത്തുന്നതാണ് കോട്ടയം വഴി വരുന്നവർക്ക് എളുപ്പം.
