കെ മധു – എസ് എന്‍ സ്വാമി കൂട്ടുകെട്ടില്‍ മമ്മൂട്ടിയെ നായകനാക്കിക്കൊണ്ട് 1988ൽ പുറത്തിറങ്ങിയ ചിത്രമാണ് ഒരു സിബിഐ ഡയറിക്കുറിപ്പ്. പിന്നീട് ഈ ചിത്രത്തിന് ശേഷം തുടര്‍ച്ചയായി ഇറങ്ങിയ സിബിഐ സീരിസുകളാണ് ജാഗ്രത, സേതുരാമയ്യര്‍ സി ബി ഐ, നേരറിയാന്‍ സിബിഐ എന്നിവ. ഇപ്പോൾ ഈ സിബിഐ സീരീസിലെ അടുത്ത ചിത്രം വരാനിരിക്കുകയാണ്. ഈ ചിത്രങ്ങളുടെ ഒരു പ്രധാന പ്രത്യേകത സിനിമയിലെ കഥാപാത്രങ്ങളെ പോലെ തന്നെ പ്രേക്ഷകരുടെ മനസ്സിൽ പതിഞ്ഞ ചിത്രത്തിന്റെ പശ്ചാത്തല സംഗീതമാണ്.
സി ബി ഐ സീരീസിലെ ആദ്യ നാലു ചിത്രങ്ങള്‍ക്കും സംഗീതം ഒരുക്കിയത് സംഗീത സംവിധായകനായ ശ്യാം ആയിരുന്നു. എന്നാല്‍, സി ബി ഐ അഞ്ചാം ഭാഗം ഒരുങ്ങുമ്ബോള്‍ ചിത്രത്തിന് പശ്ചാത്തലസംഗീതം ഒരുക്കുന്നത് ജേക്സ് ബിജോയ് ആണ്. സമൂഹ മാധ്യമങ്ങളിലൂടെ ജേക്സ് ബിജോയ് തന്നെയാണ് സമൂഹ മാധ്യമങ്ങളിലൂടെ ഇക്കാര്യം അറിയിച്ചത്. ‘ശ്യാം സാര്‍ ഒരുക്കിയ ഐക്കോണിക് തീം മ്യൂസിക് വീണ്ടും ഒരുക്കുന്നത് ഒരു അംഗീകാരമായി കാണുന്നു. കെ മധു സാര്‍, എസ് എന്‍ സ്വാമി എന്നിവര്‍ക്കൊപ്പം സര്‍ഗചിത്ര ബാനറില്‍ വര്‍ക് ചെയ്യാന്‍ തീര്‍ത്തും അക്ഷമനായി കാത്തിരിക്കുകയാണ്. ഈ മഹാമാരി എത്രയും പെട്ടെന്ന് അവസാനിക്കുമെന്ന് പ്രതീക്ഷിക്കാം. മമ്മൂക്ക സേതുരാമയ്യര്‍ സി ബി ഐ ആയി വീണ്ടും എത്തുന്നത് കാണാന്‍ കാത്തിരിക്കുന്നു ജേക്സ് ബിജോയ് ഫേസ്ബുക്കില്‍ കുറിച്ചു.
ആശ ശരത്താണ് സി ബി ഐ 5 ല്‍ മമ്മൂട്ടിയുടെ നായികയായി എത്തുന്നത്. കോവിഡ് പ്രതിസന്ധി മാറിയാല്‍ ചിങ്ങം ഒന്നിന് ചിത്രത്തിന്റെ ഷൂട്ടിംഗ് ആരംഭിക്കാനാണ് അണിയറക്കാരുടെ ആലോചന. എറണാകുളം, തിരുവനന്തപുരം, ഹൈദരാബാദ്, ദില്ലി എന്നിവിടങ്ങളിലായാണ് ലൊക്കേഷന്‍. എറണാകുളത്ത് ആയിരിക്കും ചിത്രീകരണത്തിന് തുടക്കമിടുക. മമ്മൂട്ടിക്കും ആശ ശരത്തിനുമൊപ്പം രണ്‍ജി പണിക്കര്‍, സൗബിന്‍ ഷാഹിര്‍, സായ് കുമാര്‍ എന്നിവരും ചിത്രത്തിന്റെ ഭാഗമാകും.
