സിനിമകളിൽ ഹാസ്യ വേഷങ്ങളിലൂടെ തുടങ്ങി പിന്നീട് സഹനടനായി സ്വഭാവ നടനായി നായകനായി മാറിയ താരമാണ് ഇന്ദ്രൻസ്. മലയാള സിനിമയിലേക്ക് കോസ്റ്റ്യും ഡിസൈനറായി എത്തി പിന്നീട് നായകനിരയിലേക്കുയര്‍ന്ന താരമാണ് അദ്ദേഹം. മികച്ച നടനുള്ള സംസ്ഥാന ചലച്ചിത്ര പുരസ്കാരവും ആളൊരുക്കം എന്ന സിനിമയിലൂടെ അദ്ദേഹം നേടുകയുണ്ടായി. ഇപ്പോഴിതാ കരിയറിലെ ഇതുവരെ ചെയ്യാത്ത വ്യത്യസ്തമായ വേഷത്തിൽ എത്തികയാണ് അദ്ദേഹം. ഡോ. മനു കൃഷ്ണന്‍ രചനയും സംവിധാനവും നിര്‍വ്വഹിക്കുന്ന ഗില എന്ന സിനിമയിൽ ബോഡി ബിൽഡറുടെ വേഷത്തിലാണ് ഇന്ദ്രൻസ് എത്തുന്നത്. റൂട്ട് പ്രൊഡക്ഷന്‍സിന്‍റെ ബാനറിലാണ് ചിത്രം വരുന്നത്. അദ്ദേഹത്തിന്‍റെ മേക്കോവർ ചിത്രങ്ങള്‍ ഇതിനകം സോഷ്യൽമീഡിയയിൽ വൈറലാണ്. പീരുമേട്, മണിമല, കൊച്ചി എന്നിവിടങ്ങളിലായി ചിത്രീകരണം പൂര്‍ത്തിയായ സിനിമ റിലീസിനായി ഒരുങ്ങുയാണ്. സമൂഹമാധ്യമങ്ങള്‍ യുവതലമുറയെ എങ്ങനെ സ്വാധീനിക്കുന്നു എന്നതാണ് സിനിമയുടെ പ്രമേയം.
സമൂഹമാധ്യമങ്ങളുടെ ദുരുപയോഗത്തിന് ഇരയാകുന്ന ഒരു കൂട്ടം ചെറുപ്പക്കാരും അതുമായി ബന്ധപ്പെട്ടുണ്ടാകുന്ന കൊലപാതകങ്ങളും മറ്റു പ്രശ്‌നങ്ങളുമാണ് സിനിമയുടെ പ്രമേയം. പുതുമുഖം സുഭാഷ് നായകനായി അഭിനയിക്കുന്ന ചിത്രത്തില്‍ ശ്രിയാ, അനഘ എന്നിവരാണ് നായികമാരായെത്തുന്നത്. ഇന്ദ്രന്‍സ്, കൈലാഷ്, റിനാസ്, ഡോ. ഷിനോയ്, നിയാ, ഷിയാ തുടങ്ങിയവരാണ് പ്രധാന കഥാപാത്രങ്ങള്‍. പിന്നണി ഗായകർ ഹരിശങ്കറും ശ്രുതി ശശിധരനും ആലപിച്ച ഗിലയിലെ ആദ്യ ഗാനം ‘ഈറൻ കാറ്റിൽ’ അടുത്തിടെ സത്യം ഓഡിയോസ് പുറത്തിറക്കി. ഈ ഗാനത്തിന് ഈണം പകർന്നിരിക്കുന്നത് മനു കൃഷ്ണനും ഷിനോയും ചേർന്നാണ്.
രചന നിർവ്വഹിച്ചത് ഷിനോയ് ആണ്. സിനിമയുടെ പശ്ചാത്തലസംഗീതം ക്രിസ്പിൻ. മിക്സിംഗ് അശ്വിൻ. ഛായാഗ്രഹണം ശ്രീകാന്ത്, എഡിറ്റിംഗ് ഷമീര്‍ മുഹമ്മദ്, അസ്സോസ്സിയേറ്റ് ഡയറക്ടര്‍ അനീഷ് ജോര്‍ജ്, കിയേറ്റീവ് ഹെഡ് പ്രമോദ് കെ.പിള്ള, പ്രൊജക്റ്റ് ഡിസൈനര്‍ അശ്വിന്‍, പി ആര്‍ ഒ വാഴൂര്‍ ജോസ് തുടങ്ങിയവരാണ്. 2018-ൽ പുറത്തിറങ്ങിയ ആളൊരുക്കം എന്ന ചിത്രത്തിലെ അഭിനയത്തിന് ആ വർഷത്തെ മികച്ച നടനുള്ള കേരള സംസ്ഥാന ചലച്ചിത്ര അക്കാദമി പുരസ്കാരം ഇന്ദ്രൻസിനെ തേടിയെത്തിയിരുന്നു. ശേഷം ഡോ. ബിജു സംവിധാനം ചെയ്ത വെയില്‍മരങ്ങള്‍ എന്ന ചിത്രത്തിലെ അഭിനയത്തിന് മികച്ച നടനുള്ള അന്താരാഷ്ട്ര പുരസ്കാരവും അദ്ദേഹം നേടിയിരുന്നു. 2019 ലെ സിംഗപ്പൂർ സൗത്ത് ഏഷ്യൻ ഇന്റർനാഷണൽ ഫിലിം ഫെസ്റ്റിവലിൽ മികച്ച നടനുള്ള പുരസ്കാരമാണ് വെയിൽമരങ്ങളിലൂടെ ഇന്ദ്രൻസ് കരസ്ഥമാക്കിയത്. അനുഗ്രഹീതൻ ആന്‍റണിയാണ് ഒടുവിൽ അദ്ദേഹം അഭിനയിച്ച് പുറത്തിറങ്ങിയ ചിത്രം. ഗോസ്റ്റ് റൈറ്റര്‍, ഹോം തുടങ്ങിയവയാണ് പുറത്തിറങ്ങാനിരിക്കുന്ന മറ്റ് സിനിമകള്‍.
