ഉണരൂമീ ഗാനം എന്ന പാട്ട് മലയാളി മനസുകളിൽ എന്നും ഗൃഹാതുരത്വത്തെ ഉണർത്തുന്ന ഒന്നാണ്. ഈ ഗാനം ആലപിച്ച ഗായകനും നമ്മുക്ക് ഏറെ പ്രിയപ്പെട്ട ഒരാളാണ്. സ്വതസിദ്ധമായ ആലാപന ശൈലിയിലൂടെ ആസ്വാദക ഹൃദയത്തില് ഇടം നേടിയ ഗായകനാണ് ജി വേണുഗോപാല്. കേട്ടമാത്രയില് തന്നെ പ്രേക്ഷകന്റെ മനസ്സിലേക്ക് ചേക്കേറാറുണ്ട് അദ്ദേഹത്തിന്റെ ഗാനങ്ങള്. അച്ഛാ ദിന് എന്ന ചിത്രത്തിലെ നാട്ടിലൂടെ എന്ന ഗാനം ആലപിച്ചതിനെക്കുറിച്ച് പറഞ്ഞെത്തിയിരിക്കുകയാണ് വേണുഗോപാല്. ഫേസ്ബുക്ക് കുറിപ്പിലൂടെയായിരുന്നു അദ്ദേഹം മമ്മൂട്ടിയെക്കുറിച്ച് പറഞ്ഞത്.
അഞ്ച് വർഷം മുൻപുള്ളൊരു ഗാനമാണിത്. അച്ഛാ ദിൻ എന്ന മമ്മൂട്ടി ചിത്രത്തിൽ നിന്നും. ബിജിയുടെ ഫോൺ തീർത്തും അപ്രതീക്ഷിതമായിരുന്നു. വേണുച്ചേട്ടനെക്കൊണ്ട് പാടിക്കണമെന്ന് മമ്മൂട്ടി സർ പറഞ്ഞിട്ടുണ്ട്. നമുക്കൊരു കൈ നോക്കിയാലോ? മമ്മുക്കാ ഇങ്ങനെ ഒന്നിലധികം പ്രാവശ്യം എന്നെ അത്ഭുതപ്പെടുത്തിയിട്ടുണ്ട്. ഉത്തരം, മായാവി ഈ സിനിമകളിലൊക്കെ അദ്ദേഹമായിരുന്നു എൻ്റെ പേര് നിർദ്ദേശിച്ചിട്ടുള്ളത്. നാട്ടിലൂടെ എന്ന ഈ പാട്ട് തുടങ്ങുന്നത് ഓമനത്തിങ്കൾ എന്ന താരാട്ടിലൂടെയാണ്. ഇത് വീണ്ടും ഒരു വേണുഗോപാൽ താരാട്ട് ഗാനം എന്ന് പ്രതീക്ഷിച്ചവരെ ഞെട്ടിക്കുന്നതാണ് ഗാനത്തിൻ്റെ ബാക്കി ഭാഗമെന്നും വേണുഗോപാൽ പറയുന്നു.
സിനിമ റിലീസിന് ഒരാഴ്ച മുൻപായിരുന്നു പ്രമോ ഷൂട്ട്. മമ്മൂക്കയെ നേരിൽ കാണുമ്പോൾ പലപ്പോഴും ആദരവും ബഹുമാനവും കൊണ്ട് ഞാൻ അധികം സംസാരിക്കാറില്ല. പാട്ട് പാടാറില്ലെങ്കിലും വിപുലമായ ഒരു സംഗീത കളക്ഷനും, കൃത്യമായ നിരീക്ഷണ പാടവത്താലും അദ്ദേഹം എന്നും ഒരത്ഭുതം തന്നെയാണെന്നും വേണുഗോപാൽ കുറിച്ചിട്ടുണ്ട്.
