മലയാളികളുടെ നെഞ്ചിൽ ഇടം നേടിയ യുവ സംവിധായകന്മാരിൽ ഒരാളാണ് ബോസില് ജോസഫ്. ബേസിലിന്റെ സംവിധാനത്തിൽ ടോവിനൊ തോമസിനെ നായകനാക്കി ഒരുക്കുന്ന ഏറ്റവും പുതിയ ചിത്രമാണ് മിന്നല് മുരളി. കഴിഞ്ഞ വര്ഷം സിനിമയുടെ ചിത്രീകരണവുമായി ബന്ധപ്പെട്ട് ചില പ്രശ്നങ്ങള് ഉയര്ന്ന് വന്നത് വലിയ വാര്ത്തയായിരുന്നു. എന്നാല് ഇപ്പോഴിതാ ഈ ചിത്രത്തിലെ ഒരു പ്രധാന കഥാപാത്രത്തെ അവതരിപ്പിച്ച കുഞ്ഞേട്ടന് എന്നയാളുടെ വേര്പാടിനെ കുറിച്ചുള്ള തന്റെ ദുഃഖം പങ്കുവെച്ച് എത്തിയിരിക്കുകയാണ് സംവിധായകന് ബേസിൽ ജോസഫ്.
ബേസിലിന്റെ കുറിപ്പ് ഇങ്ങനെ, മിന്നല് മുരളി സിനിമയിലെയും സിനിമാ സെറ്റിലേയും മിന്നും താരം ആയിരുന്ന അച്ചന്കുഞ്ഞേട്ടന് ഇന്നലെ ഹൃദയാഘാതം മൂലം അന്തരിച്ചു. വയനാട്ടിലെ ഷൂട്ടിങ്ങിനിടയില് ജൂനിയര് ആര്ട്ടിസ്റ് ആയി വരികയും പിന്നീട് അസാധ്യമായ നര്മ്മബോധവും ടൈമിങ്ങും സിനിമയിലെ ഒരു മുഴുനീള കഥാപാത്രത്തിലേക്ക് അദ്ദേഹത്തെ എത്തിക്കുകയുമുണ്ടായി. എന്ത് ടെന്ഷന് ഉള്ള ഷൂട്ടിനിടയിലും അച്ഛന് കുഞ്ഞേട്ടന് ആ വഴി പോയാല് ബഹു കോമഡി ആണ്. അത്രക്ക് പോസീറ്റിവിറ്റി ആയിരുന്നു ലൊക്കേഷനില് അദ്ദേഹം പടര്ത്തിയിരുന്നത്. അത് കൊണ്ടു തന്നെ മാസങ്ങള് നീണ്ടു നിന്ന ഷൂട്ടിംഗ് അവസാനിച്ചപ്പോഴേക്കും ഞങ്ങളുടെയും നാട്ടുകാരുടെയും ഒക്കെ പ്രിയങ്കരന് ആയി മാറിയിരുന്നു അദ്ദേഹം.
പട്ടിണിയും ദാരിദ്ര്യവും, ഒറ്റപ്പെടലും ഒക്കെ ഒരുപാട് അനുഭവിച്ചിരുന്നെങ്കിലും ഒരിക്കലും അത് പുറത്തു കാണിക്കാതെ, ചുറ്റുമുള്ളവരെ ചിരിപ്പിക്കാന് മാത്രം ശ്രമിച്ചിരുന്ന അച്ഛന് കുഞ്ഞേട്ടന്. ഒടുവില് താന് ആദ്യമായും അവസാനമായും അഭിനയിച്ച സിനിമ ഒന്ന് കാണാന് കഴിയാതെ യാത്രയായതില് ഒരുപാട് വിഷമമുണ്ട്. എങ്കിലും അവസാന നാളുകളില് ഒരു സിനിമയില് അഭിനയിക്കാന് അവസരം ലഭിക്കുകയും, ആ സിനിമയോടൊപ്പം പല നാടുകള് സഞ്ചരിക്കുകയും, പല ആളുകളുമായി ഇടപെടുകയും ഒക്കെ ചെയ്യാന് ഉള്ള ഭാഗ്യം അദ്ദേഹത്തിന് ഉണ്ടായി എന്നതില് ആശ്വസിക്കുന്നു. ആദരാഞ്ജലികള്.
