ഇന്ന് ലോകമെങ്ങും ക്രിസ്മസ് ആഘോഷിക്കുന്ന ദിവസം. പക്ഷേ, ആസ്ട്രേലിയന്‍ പര്യടനത്തിനെത്തിയ ഇന്ത്യന്‍ ക്രിക്കറ്റ് ടീമിന് ഈ ക്രിസ്തുമസ് നോവിന്റേതാണ്. ആദ്യ ടെസ്റ്റില്‍ അതിദയനീയമായി തോറ്റതിന്റെ മുറിപ്പാടില്‍നിന്നും ഇപ്പോഴും രക്തമൊഴുകുന്നു. ഒരു വശത്ത് കോവിഡിെന്‍റ രണ്ടാം വരവില്‍ ആസ്ട്രേലിയ അതിര്‍ത്തികള്‍ക്ക് താഴിട്ടുകൊണ്ടിരിക്കുന്നു. രാജ്യം വീണ്ടും ഭീതിയില്‍ വിറക്കുന്നു.അതിനിടയില്‍ നായകന്‍ നാട്ടിലേക്ക് വണ്ടി കയറി.
ക്രിസ്മസിന്റെ അടുത്ത ദിവസം ബോക്സിങ് ഡേ എന്നറിയപ്പെടുന്നു. ക്രിസ്മസില്‍ ബാക്കിവെച്ച ആഘോഷങ്ങള്‍ അവസാനിക്കാത്ത ദിനം. ബോക്സിങ് ഡേയില്‍ മെല്‍ബണ്‍ മൈതാനത്ത് രണ്ടാം ടെസ്റ്റിനിറങ്ങുമ്പോൾ വിരാട് കോഹ്ലി ഏല്‍പിച്ചുപോയ കപ്പിത്താന്‍ പദവിയില്‍ അജിന്‍ക്യ രഹാനെക്കു പിടിപ്പതു പണിയാണ്. ഇത് രഹാനെക്കു മാത്രമല്ല, കോച്ച്‌ രവിശാസ്ത്രിക്കും വെല്ലുവിളിയാണ്.
ഏകദിന പരമ്പര 2-1ന് തോറ്റ ശേഷം ട്വന്‍റി 20യില്‍ ശക്തമായി തിരിച്ചുവന്ന ഇന്ത്യ 2-1ന് പരമ്പര സ്വന്തമാക്കിയിരുന്നു. എന്നാല്‍, അഡ്ലെയ്ഡില്‍ പകലും രാത്രിയുമായി നടന്ന പിങ്ക്ബാള്‍ ടെസ്റ്റില്‍ ഇന്ത്യക്ക് പിണഞ്ഞത് ചരിത്ര തോല്‍വിയായിരുന്നു. ആദ്യ ഇന്നിങ്സില്‍ 53 റണ്‍സിെന്‍റ ലീഡ് സ്വന്തമാക്കിയ ശേഷമായിരുന്നു രണ്ടാം ഇന്നിങ്സില്‍ ഇന്ത്യയുടെ ചരിത്രത്തിലെ ഏറ്റവും കുറഞ്ഞ സ്കോറായ 36 റണ്‍സിന് പുറത്തായത്. ആദ്യ രണ്ടു സെഷനിലും മുന്നിട്ടുനിന്ന ശേഷം ഇങ്ങനെ തലകുത്തി വീണൊരു ടീം എങ്ങനെ അടുത്ത മത്സരത്തില്‍ ഉയിര്‍ത്തെഴുന്നേല്‍ക്കുമെന്ന് ക്രിക്കറ്റ് നിരീക്ഷകര്‍ ആശങ്ക പ്രകടിപ്പിച്ചത് അസ്ഥാനത്തല്ല. മാത്രവുമല്ല, വിദേശ പിച്ചുകളില്‍ ഇന്ത്യന്‍ ബൗളിങ്ങിന് വിശ്വസിക്കാവുന്ന മുഹമ്മദ് ഷമി പരിക്കുപറ്റി ശേഷിക്കുന്ന മത്സരങ്ങളില്‍നിന്ന് പുറത്തിരിക്കുന്നതും വലിയ തിരിച്ചടിയായി.
ആദ്യ ഇലവനില്‍ ആരെയൊക്കെ ഉള്‍പ്പെടുത്തുമെന്ന കാര്യത്തില്‍ അജിന്‍ക്യ രഹാനെക്കും ശാസ്ത്രിക്കും തലവേദന ചെറുതായിരിക്കില്ല. ആദ്യം കോഹ്ലിക്കും ഷമിക്കും പകരക്കാരെ കണ്ടെത്തണം. ബാറ്റിങ്ങിലെ പഴുതുകള്‍ അടയ്ക്കണം. ഓപണര്‍ സ്ഥാനത്ത് ആദ്യ ടെസ്റ്റിലെ രണ്ട് ഇന്നിങ്സിലും പരാജയമായ പൃഥ്വിഷായെ പുറത്തിരുത്താനാണ് സാധ്യത. സുനില്‍ ഗവാസ്കര്‍ അടക്കമുള്ളവര്‍ ഷായുടെ ബാറ്റിങ്ങിനെ ഏറെ വിമര്‍ശിക്കുക കൂടി ചെയ്ത സാഹചര്യത്തില്‍ ഷാ പുറത്തുതന്നെയിരിക്കും. പകരം ലോകേഷ് രാഹുലോ ശുഭ്മാന്‍ ഗില്ലോ എന്ന കാര്യത്തില്‍ തര്‍ക്കത്തിനിടയുണ്ട്. അനുഭവസമ്ബത്തിന് മുന്‍തൂക്കം നല്‍കിയാല്‍ ഗില്ലിനെക്കാള്‍ രാഹുലിനാവും സാധ്യത. മായങ്ക് അഗര്‍വാളിനെ തല്‍ക്കാലം മാറ്റി പ്രതിഷ്ഠിക്കാന്‍ സാധ്യത കാണുന്നില്ല.
ചേതേശ്വര്‍ പുജാരയുടെ കാര്യത്തില്‍ മാറ്റമുണ്ടാകില്ല. ആദ്യ ടെസ്റ്റില്‍ കാര്യമായ സംഭാവന ചെയ്തില്ലെങ്കിലും സന്നാഹ മത്സരത്തില്‍ സെഞ്ച്വറി അടിച്ച ഹനുമ വിഹാരിയെ നിലനിര്‍ത്തിയാല്‍ ആള്‍ റൗണ്ടര്‍ സ്ഥാനത്ത് രവീന്ദ്ര ജദേജയുടെ സാധ്യത മങ്ങും. വിക്കറ്റിനു പിന്നില്‍ വൃദ്ധിമാന്‍ സാഹയുടെ സാന്നിധ്യം മതിയോ , അതോ സന്നാഹത്തിലെ സെഞ്ചൂറിയന്‍ ഋഷഭ് പന്തിനെ പരീക്ഷിക്കണോ എന്ന കാര്യവും രഹാനെയെ അലട്ടുന്നുണ്ട്.ബൗളിങ്ങില്‍ ജസ്പ്രീത് ബുംമ്രക്കും ഉമേഷ് യാദവിനും രവിചന്ദ്ര അശ്വിനും ഇളക്കമുണ്ടാവില്ല. ഷമിക്കു പകരം മുഹമ്മദ് സിറാജിനെയോ നവദ്വീപ് സെയ്നിയെയോ പരിഗണിച്ചാല്‍ അത് അവരുടെ ടെസ്റ്റ് അരങ്ങേറ്റത്തിന് വഴിയൊരുങ്ങും. ഇന്ത്യയുടെ ഹിറ്റ്മാന്‍ രോഹിത് ശര്‍മ ആസ്ട്രേലിയയില്‍ എത്തിയെങ്കിലും ക്വാറന്‍റീന്‍ കഴിഞ്ഞ് മൂന്നാം ടെസ്റ്റില്‍ മാത്രമേ ഇറങ്ങൂ.
മറുവശത്ത് ഓസീസ് ടീം സര്‍വസജ്ജമാണ്. ബാറ്റിങ്ങിലും ബൗളിങ്ങിലും ബഹുദൂരം മുന്നിലാണ് ടിം പെയ്ന്‍ നയിക്കുന്ന ടീം. 2014ലെ ഓസീസ് പര്യടനത്തിെന്‍റ നടുവില്‍ ബോക്സിങ് ഡേ ടെസ്റ്റ് കഴിഞ്ഞയുടനെയായിരുന്നു മഹേന്ദ്ര സിങ് ധോണി ക്യാപ്റ്റന്‍ സ്ഥാനമൊഴിഞ്ഞത്. അന്ന് കിട്ടിയ പദവിയില്‍ വിരാട് കോഹ്ലി ഇന്ത്യയുടെ മികച്ച നായകനായി മാറി. ഇപ്പോള്‍ പരമ്ബര മധ്യത്തില്‍ അജിന്‍ക്യ രഹാനെക്ക് വീണുകിട്ടിയ ഈ പദവി പുതിയൊരു നായകെന്‍റ തിരുപ്പിറവിയാകുമോ എന്ന് കാത്തിരുന്നു കാണാം….
