മലയാള മിനിസ്ക്രീൻ പ്രേക്ഷകർക്ക് ഏറെസുപരിചിതനായ താരമാണ് അനീഷ് രവി. നിരവധി പരമ്പരകളിലും സിനിമകളിലും താരം അഭിനയിച്ചു കഴിഞ്ഞു. കാര്യം നിസാരം എന്ന പരമ്പരയിലെ മോഹനകൃഷ്ണൻ എന്ന സത്യസന്ധനായ വില്ലജ് ഓഫീസറായി എത്തിയപ്പോൾ താരത്തിന്റ ജനസമ്മതി വീണ്ടും ഉയർന്നിരുന്നു. ഇപ്പോഴിതാ മരണത്തെ മുഖാമുഖം കണ്ട സന്ദര്‍ഭത്തെ കുറിച്ച് തുറന്ന് പറഞ്ഞിരിക്കുകയാണ് താരം. തലവേദന വന്നതും പിന്നീട് അത് ട്യൂമര്‍ ആണെന്ന് തിരിച്ചറിയുകയായിരുന്നു. രണ്ട് വര്‍ഷത്തെ ചികിത്സയ്ക്ക് ശേഷമാണ് പഴയ സ്ഥിതിയിലേക്ക് മടങ്ങി എത്തിയത് എന്നും അനീഷ് ഒരു അഭിമുഖത്തില്‍ സംസാരിക്കവെ തുറന്ന് പറഞ്ഞു.
2016 2017 കാലഘട്ടത്തില്‍ മിന്നുകെട്ട് എന്ന പരമ്പരയില്‍ അഭിനയിച്ചു കൊണ്ടിരിക്കവെയാണ് കടുത്ത തലവേദന അനുഭവപ്പെട്ടത്. വേദന സംഹാരികള്‍ പലതും കഴിച്ചെങ്കിലും വേദനയ്ക്ക് ഒരു മാറ്റവുമുണ്ടായില്ല. ഉറങ്ങുവാന്‍ പോലും കഴിയാത്ത അവസ്ഥയില്‍ ആയിരുന്നു. തലവേദനയ്ക്ക് ചികിത്സ നേടിയെങ്കിലും മാറ്റം ഒന്നും ഉണ്ടായില്ല. തലവേദന കാരണം എല്ലാം കൈവിട്ട് പോകുന്ന അവസ്ഥയായിരുന്നു. രോഗം എന്താണ് എന്ന് തിരിച്ചറിയാന്‍ പറ്റിയില്ല. ആ സമയത്ത് ഒന്നും വേണ്ട, അസുഖമില്ലാതെ എഴുന്നേറ്റ് നില്‍ക്കാന്‍ മാത്രം കഴിഞ്ഞാല്‍ മതി എന്നായിരുന്നു പ്രാര്‍ത്ഥന.
കരിയറും ജീവിതവും എല്ലാം പോകും എന്ന അവസ്ഥയായിരുന്നു. ഭാര്യയുടെ ചേച്ചി ഡോ. രാജലക്ഷ്മിയാണ് ശ്രീചിത്ര മെഡിക്കല്‍ സെന്ററിലെ ന്യൂറോ സര്‍ജനായ ഡോ. ഈശ്വരിയുടെ അടുത്തെത്തിച്ചത്. തന്റെ തലച്ചോറില്‍ ഒരു സ്പോട്ട് രൂപപ്പെട്ടിട്ടുണ്ടെന്ന് മനസിലാവുന്നത് അവിടെ വച്ചാണ്. മരണത്തിന്റെ മുഖത്ത് നിന്ന് തന്നെ രക്ഷിച്ച ഈശ്വരന്‍ തന്നെയാണ് ഡോ. ഈശ്വരി. ആ സമയത്ത് ഡോക്ടര്‍ നല്‍കിയ പിന്തുണയെ കുറിച്ച് പറയാതിരിക്കാന്‍ കഴിയില്ല. കുഴപ്പമില്ല, ചികിസത്സിച്ച് മാറ്റാം എന്നൊക്കെയുള്ള വാക്കുകളാണ് തനിക്ക് ശക്തി നല്‍കിയത്. രണ്ട് വര്‍ഷം നീണ്ടു നിന്ന ചികിത്സയ്ക്ക് ഒടുവിലാണ് പഴയ സ്ഥിതിയിലേക്ക് തിരിച്ചെത്തിയത്. രോഗം ഇപ്പോള്‍ പൂര്‍ണമായും മാറി എന്നാണ് അനീഷ് രവി പറയുന്നത്.
