ആന് അഗസ്റ്റിൻ,ലാല്ജോസ് ഒരുക്കിയ എല്സമ്മ എന്ന ആണ്കുട്ടിയിലൂടെയാണ് അഭിനയ രംഗത്തെക്ക് കടന്നു വന്നത്. ആദ്യ ചിത്രത്തിൽ തന്നെ മികച്ച പ്രകടനം കാഴ്ച വച്ച താരത്തിന് പിന്നീട് ഒട്ടനവധി ചിത്രങ്ങളുടെ ഭാഗമാകുവാൻ സാധിച്ചു. ഒരു ഇടവേളയ്ക്ക് ശേഷം അഭിനയ രംഗത്തേക്ക് മടങ്ങിയെത്തുകയാണ് നടി. വീണ്ടും അഭിനയ രംഗത്തേക്ക് മടങ്ങി എത്തുമെന്ന് ഒരിക്കലും വിചാരിച്ചില്ലെന്ന് ആന് പറയുന്നു. സിനിമയില് നിന്നും വിട്ടു നില്ക്കാന് തനിക്ക് യാതൊരു താത്പര്യവും ഇല്ലായിരുന്നു എന്നും ആന് പറയുന്നു. ഒരു മാധ്യമത്തിന് നല്കിയ അഭിമുഖത്തിലാണ് ആന് മനസ് തുറന്നത്.
അഭിനയത്തിലേക്ക് തിരിച്ച് വരുമെന്ന് ഞാന് ഒരിക്കലും വിചാരിച്ചിരുന്നില്ല. വീട്ടിലിരുന്ന് മടുത്തപ്പോഴാണ് ഞാനൊരു ആഡ് പ്രൊഡക്ഷന് കമ്പനി ആരംഭിക്കുന്നത്. അടുത്തിടെയാണ് എനിക്ക് സിനിമയില് അഭിനയിക്കാന് അവസരം ലഭിച്ച് തുടങ്ങിയത്. അത് അങ്ങനെ സംഭവിച്ച് പോവുകയായിരുന്നു. സിനിമയില് നിന്ന് വിട്ട് നില്ക്കാന് എനിക്ക് താത്പര്യം ഇല്ലായിരുന്നു. പക്ഷെ ആ സമയത്ത് ഞാന് അങ്ങനെ ചെയ്തു. എന്തുകൊണ്ടാണ് അത് ചെയ്തത് എന്ന് എനിക്ക് അറിയില്ല,’ എന്നാണ് ആന് പറഞ്ഞത്.
ഓട്ടോറിക്ഷക്കാരന്റെ ഭാര്യയുടെ ചിത്രീകരണം തുടങ്ങിയ ദിവസത്തെ കുറിച്ചും ആന് സംസാരിച്ചു. എം മുകുന്ദന്റെ കഥ, ഹരികുമാര് സാറിന്റെ സംവിധാനം, പിന്നെ സുരാജ് വെഞ്ഞാറമൂട്. ഈ മൂന്ന് പേരും ഒരുമിച്ച് വരുന്ന ഒരു സിനിമ വേണ്ടെന്ന് വെക്കാന് ആര്ക്കും സാധിക്കില്ലെന്നാണ് ആന് പറഞ്ഞത്. വീണ്ടും ക്യാമറയുടെ മുന്നില് നിന്നപ്പോള് വല്ലാതെ ഇമോഷണല് ആയിരുന്നു. തന്റെ അമ്മയും ആന്റിയും ഒപ്പം ഉണ്ടായിരുന്നു. ആദ്യമായി സ്കൂളില് പോകുന്ന പോലെയുള്ള പേടിയും മനസില് ഉണ്ടായിരുന്നു. പക്ഷെ ഹരി സര് മുതല് സുരാജേട്ടന് വരെയുള്ള എല്ലാവരും തന്നെ നന്നായി സഹായിച്ചുവെന്നും ആന് വ്യക്തമാക്കി.
