മികച്ച പ്രതികരണമാണ് ജീത്തു ജോസഫ് മോഹൻലാലിനെ നായകനാക്കി സംവിധാനം ചെയ്ത ദൃശ്യം 2 വിന് പ്രേക്ഷകരിൽ നിന്ന് ലഭിച്ചത്. ചിത്രത്തിന് ഒരുപാട് അന്യഭാഷകളിൽ നിന്നുപോലും അഭിനന്ദനങ്ങൾ എത്തിയിരുന്നു. ഇപ്പോഴിതാ ട്വിറ്ററിലൂടെ ചിത്രത്തെ പ്രശംസിച്ചുകൊണ്ട് പ്രശസ്ത ആഫ്രിക്കൻ ബ്ലോഗർ ഫീഫി അദിൻക്രാ എത്തിയിരിക്കുകയാണ്. ഫീഫി അദിൻക്രാ ട്വീറ്റ് ചെയ്തിരിക്കുന്നത് ലോക പ്രശസ്ത വെബ് സീരിസായ മണി ഹെയ്സ്റ്റിലെ പ്രൊഫസർ എന്ന കഥാപാത്രത്തെ മറന്നുകൊള്ളാനും പ്രൊഫസറേക്കാൾ ജീനിയസാണ് ദൃശ്യത്തിലെ മോഹൻലാലിന്റെ കഥാപാത്രമായ ജോർജു കുട്ടിയെന്നുമാണ്. ദൃശ്യം 3 വരാനായി താൻ കാത്തിരിക്കുന്നു എന്നും അദ്ദേഹം കുറിച്ചു.
ആമസോൺ പ്രൈമിൽ ഫെബ്രുവരി 19 നായിരുന്നു ദൃശ്യം 2 റിലീസ് ചെയ്തത്. മോഹൻലാലിന്റെ ജോർജ് കുട്ടി എന്ന കഥാപാത്രത്തിനും, ജീത്തു ജോസഫിന്റെ മികച്ചൊരു ക്രൈം ത്രില്ലറിനും വളരെ നല്ല പ്രതികരണങ്ങളാണ് ലഭിച്ചുകൊണ്ടിരിക്കുന്നത്. ദൃശ്യത്തിന്റെ മൂന്നാം ഭാഗത്തിനായി ക്ലൈമാക്സ് മനസിലുണ്ടെന്നും അത് മോഹൻലാലിന് ഇഷ്ടമായെന്നും സംവിധായകൻ മുൻപേ പറഞ്ഞിട്ടുണ്ട്. അദ്ദേഹം ദൃശ്യം 3 യെ കുറിച്ചുള്ള വിശേഷങ്ങൾ പങ്കുവെച്ചത് കോട്ടയം പ്രസ് ക്ലബ്ബിൽ വെച്ച് നടന്ന പ്രസ് മീറ്റിലായിരുന്നു.
